ՄԱԿ-ում ԱՄՆ-ի ներկայացուցիչը դեմ է արտահայտվել Ռուսաստանի կողմից Ուկրաինա օգնություն ուղարկելուն

21:02 • 08.08.14

Ուկրաինային բնակիչներին մարդասիրական օգնություն պետք է տրամադրեն միջազգային կազմակերպությունները,  ոչ թե Ռուսաստանը: Ինչպես տեղեկացնում է Интерфакс-ը՝ այս մասին հայտարարել է ՄԱԿ-ում ԱՄՆ-ի մշտական ներկայացուցիչ Սամանտա Փաուերը:


«Ուկրաինային օգնություն պետք է ցուցաբերեն միջազգային մարդասիրական կազմակերպությունները, որոնք պրոֆեսիոնալ են, փորձ և անկախություն ունեն: Օգնություն չպետք է ցուցաբերի Ռուսաստանը»,-ասել է Փաուերը՝ ՄԱԿ-ի անվտանգության խորհրդի նիստում:

 

Նա հիշեցրել է, որ Ուկրաինան միջազգային հումանիտար խմբերին թույլ է տվել իր տարածք օգնություն հասցնել, քանի որ «որևէ տրամաբանական հիմք չկա, որ դա կփորձեր անել Ռուսաստանը»:
 

Փաուերը հայտարարել է, թե Ռուսաստանի միակողմանի միջամտությունը Ուկրաինայի ներքին գործերին, այդ թվում՝ մարդասիրական օգնություն հասցնելու պատրվակով, կգնահատվի որպես ներխուժում:

 

Օգոստոսի 6-ին ՄԱԿ-ի Անվտանգության խորհրդի նիստի ընթացքում ՌԴ մշտական ներկայացուցիչ Վիտալի Չուրկինը հայտարարել էր, թե Մոսկվան պատրաստվում է օգնություն ուղարկել Ուկրաինա Կարմիր խաչի միջազգային կոմիտեի հովանու ներքո, ընդգծելով, որ երկրում հումանիտար իրադրությունն աղետալի է: