Տեխասում դեռահասը 4 օր գիշերել է սուպերմարկետում

16:00 • 14.08.14

Ամերիկացի դեռահասը 4 օր ապրել է Տեխասի շուրջօրյա սուպերմարկետներից մեկում, հայտնում է lenta.ru ռուսական լրատվական կայքը՝ հղում անելով CBS Local լրատվամիջոցին:

 

Այդ ամբողջ ընթացքում 14-ամյա տղան հասցրել է երկու թաքստոց պատրաստել՝ սառնարանների և սուպերմարկետի դարակների արանքում:

 

Երիտասարդը սնվել է նույն սուպերմարկետից գողացված սննդով: Խանութում շրջելու ժամանակ նա մշտապես փոխել է իր հագուստը, իսկ զուգարան չգնալու համար օգտագործել է տակդիրներ: 

 

Աշխատակիցները նրան հայտնաբերել են սուպերմարկետի բաժիններից մեկում և ոստիկանություն կանչել: Վերջիններս էլ նրան հանձնել են բարեկամներին: Պարզվել է, որ երեխայի ծնողները նրան թողել են ազգականի տանը, իսկ իրենք մեկնել նահանգից: Դրանից 2 օր անց երեխան փախել է տնից: