Աշնանը պետք է պատրաստ լինենք արտահերթ փոփոխությունների. Զարուհի Փոստանջյան

18:14 • 21.08.14

Ազգային ժողովի «Ժառանգություն» խմբակցության պատգամավոր Զարուհի Փոստանջյանը գտնում է, որ աշնանը, իհարկե, քաղաքական զարգացումներ տեղի կունենան, որովհետև պարզ է, որ ամբողջ նախկին խորհրդային միության քարտեզը դեֆորմացված է:

«Զարգացումները պետք է բոլորս հաշվի առնենք և պատրաստ լինենք արտահերթ փոփոխությունների, բայց դրա համար պետք է հասարակական պահանջը կազմակերպվի, իսկ կազմակերպողները պետք է լինեն նաև քաղաքական կառույցներ լինեն»,-այսօր «Ազատություն» ռ/կ-ի ֆեյսբուքյան ասուլիսին ասաց նա:

Վերջինս պատասխանեց նաև հարցին, թե ինչ իրավիճակ է «Ժառանգություն» կուսակցությունում՝ ասելով. «Նախ, Ժառանգության դուռը բոլորի առջև է բաց, Ժառանգությունում Ձեզ կընդունի նաև Ստյոպա Սաֆարյանը: Ես պատվով եմ կրում իմ կուսակցական լինելը, ոչ միայն վստահում եմ, այլ կարծում եմ նաև, որ Ժառանգությունն ապացուցել է, որ արժանի է լինել քաղաքական կազմակերպություն»: 

Զարուհի Փոստանջյանը նաև հայտարարեց, որ այո, մի օր կուսակցության առաջնորդ Րաֆֆի Հովհաննիսյանին ժողովուրդը կտեսնի երկրի նախագահի դերում: 

Հարց հնչեց նաև պատգամավորի՝ ԱՄՆ-ում սովորելու վերաբերյալ, որին Փոստանջյանը պատասխանեց, թե հովանավոր, իհարկե, եղել է, և ցանկացածը կարող է մասնակցել այդպիսի մրցույթի և շահել: 

Իրաքյան եզդիների խնդրի մասին էլ Փոստանջյանն ասաց, որ միանշանակ պետք է ՀՀ պետական այրերի կողմից գնահատականի արժանանա այն, ինչ տեղի է ունենում Իրաքում: