Լևոն Հայրապետյանին ազատ արձակելու պահանջով բողոքի ակցիա է անցկացվել Նյու Յորքում ՌԴ հյուպատոսության առաջ (նկարներ, տեսանյութ)

11:15 • 23.08.14

Նյու Յորքում ՌԴ հյուպատոսության շենքի առաջ օգոստոսի 22-ին բողոքի ակցիա է տեղի ունեցել ի պաշտպանություն հայ գործարար, հասարակական գործիչ Լևոն Հայրապետյանի: Այս մասին տեղեկանում ենք Լևոն Հայրապետյանի ֆեյսբուքյան էջից:

 

Ակցիայի մասնակիցները պահանջել են ազատ արձակել գործարարին:

 

Հիշեցնենք, որ Մոսկվայի քաղաքային դատարանն օգոստոսի 15-ին հրաժարվել էր ազատ արձակել Լևոն Հայրապետյանին, որը համարվում է ամենահարուստ հայ գործարարներից մեկն աշխարհում:

 

Պաշտպանությունը խնդրել էր նրան ստորագրությամբ կամ գրավի դիմաց ազատ արձակել, սակայն դատարանն օրինական էր ճանաչել հայ գործարարի կալանքը:


Հայրապետյանին ներկայացվել է դրամական միջոցների վատնման և լվացման մեղադրանք:

 

Դատական նիստի ընթացքում Հայրապետյանի փաստաբան Հենրի Ռեզնիկը նշել էր, որ մեղադրյալն արդեն 65 տարեկան է և դա պատկառելի տարիք է: Բացի այդ, նա տառապում է մի շարք հիվանդություններով՝ սրտի ռիթմի խախտմամբ, քաղցկեղով և երկու անգամ ուղեղի կաթված է տարել: Պաշտպանությունը նշել էր, որ Հայրապետյանի առողջական վիճակը զգալիորեն վատացել է և կարող է ճակատագրական լինել:

 

Մեղադրյալը դատական նիստին մասնակցել էր մեկուսարանից՝ տեսակապի միջոցով: Նա հայտարարել էր վատ ինքնազգացողության մասին և խնդրել է, որ բողոքարկումը քննեն առանց իր ներկայության, սակայն դատարանը վճռել էր, որ նրա ներկայությունը պարտադիր է: