Ռուսաստանը պատրաստվում է մարդասիրական բեռներով նոր ավտոշարասյուն ուղարկել Ուկրաինա

12:49 • 25.08.14

Ռուսաստանն Ուկրաինայի արտգործնախարարություն նոտա է հղել, որով տեղեկացրել է նոր մարդասիրական բեռներով ավտոշարասյուն պատրաստելու մտադրության մասին: Այդ մասին ճեպազրույցի ժամանակ հայտարարել է ՌԴ արտաքին գործերի նախարար Սերգեյ Լավրովը, հայտնում է ԻՏԱՌ ՏԱՍՍ գործակալությունը:

 

«Նոտա ենք հղել Ուկրաինայի ԱԳՆ՝ տեղեկացնելով մարդասիրական օգնության հերթական շարասյունը պատրաստելու մտադրության մասին»,- ասել է Լավրովը: Նա նշել է, որ ռուսական կողմն առաջարկել է մի շարք բեռներ, որոնք պատրաստվում են ուղարկել:

 

«Պատրաստ ենք Կարմիր Խաչի միջազգային կոմիտեի հետ ամենասերտ համագործակցության»,- հավելել է ՌԴ ԱԳՆ-ի ղեկավարը:


Ռուսաստանը հույս ունի, որ նոր շարասյունն Ուկրաինա կմեկնի նույն երթուղով արդեն այս շաբաթվա ընթացքում, ընդգծել է Լավրովը:

 

Հիշեցնենք, որ մարդասիրական բեռներով նախորդ բեռնատարներն արդեն վերադարձել են Ուկրաինայից: