ՓՄՁ-ն մտնելու է Կարմիր գիրք. տոնավաճառների աշխատակիցներն ակցիա են անում ու հանրահավաք խոստանում (լուսանկար, տեսանյութեր)

11:01 • 25.09.14

Մինչ կառավարության նիստը սկսվելը գործադիրի շենքի առջև են հավաքվել մի շարք տոնավաճառների 100-ից ավելի աշխատակիցներ։ Նրանք պահանջում են հետ կանչել հոկտեմբերի 1-ից ուժի մեջ մտնող «Շրջանառության հարկի մասին» ՀՀ օրենքը։


Ինչպես լրագրողների հետ զրույցում նշեց ակցիայի մասնակիցներից Գագիկ Ալավերդյանը՝ օրենքը մշակվել է հատուկ ՓՄՁ-ն վերացնելու համար։


Լրագրողների հետ զրույցում «Փոքր և միջին ձեռներեցության հայկական միության» նախագահ Ստեփան Ասլանյանը նշեց, որ օրենքի ուժի մեջ մտնելուց հետո ՓՄՁ-ն մտնելու է Կարմիր գիրք։ Բացի այդ, նա տեղեկացրեց, որ այս ոլորտի աշխատողները սեպտեմբերի 30-ին հանրահավաք են հրավիրում։


«Կան ոլորտներ, որոնց համար այս օրենքն իրոք օգտակար է, բայց ՓՄՁ ոլորտի հիմնական մասը, որը կախված է խոշոր բիզնեսից՝ այս օրենքի պայմաններում չի կարող գոյատևել։ Պահանջում ենք օրենքը հետ կանչել և կրկին քննարկել առաջացած խնդիրները»,- նշեց նա։


«Հրազդան» տոնավաճառի աշխատող Սամվել Հակաբովն էլ տեղեկացրեց, որ տարբեր շուկաների աշխատողների թույլ չեն տվել այսօր մասնակցել ակցիային, մասնավորապես՝ «Մալաթիայի» և ոսկու շուկայի տնօրինությունը։


Հիշեցնենք, որ այս տարվա հոկտեմբերի 1-ից ուժի է մեջ մտնում «Շրջանառության հարկի մասին» ՀՀ նոր օրենքը։ Ըստ այս օրենքի՝ փոքր ու միջին ձեռնարկությունները պետք է փաստաթղթեր ներկայացնեն առանձին ապրանքների վերաբերյալ։ Փաստաթուղթ չներկայացնելու դեպքում ձեռնարկությունն առաջին անգամ նախազգուշացում է ստանում, երկրորդ անգամ՝ տուգանվում 20 հազար դրամի չափով, երրորդ անգամ՝ շրջանառության հարկի 5 տոկոսի չափով: