Ցուցարարները Հոնկոնգում բարիկադներ են կառուցում (լուսանկարներ)
Չինաստանի հատուկ վարչական շրջան Հոնկոնգում արդեն 5-րդ օրը շարունակվում են բողոքի ակցիաները, որոնց մասնակիցները պահանջում են շրջանի ընտրական համակարգի ժողովրդավարացում:
Սեպտեմբերի 30-ի գիշերը ցուցարարները սկսել են բարիկադներ կառուցել և ջրի ու մթերքի պաշար հավաքել՝ պատրաստվելով երկարատև ակցիայի: Ոստիկանությունը դեռ զսպվածություն է ցուցաբերում, գիշերն անցել է առանց բախումների, հաղորդում է Deutsche Welle-ն:
Ոմանց կարծիքով՝ իրավիճակը կարող է փոխվել չորեքշաբթի օրը: Այդ օրը նշվում է Չինաստանի Ժողովրդական Հանրապետության ստեղծման տարեդարձը, չի բացառվում, որ ոստիկանությունը կփորձի ցրել ցուցարարներին: «Ամեն դեպքում մենք այստեղ ենք մնում»,- հայտարարել է ցուցարար ուսանողների ներկայացուցիչը և հավելել, որ գալիք գիշերն ամենածանրն է լինելու:
Հոնկոնգի իրադարձությունների ֆոնին Տոկիոյի բորսայում գրանցվել է բաժնետոմսերի գների անկում: Իրավիճակի անկայունությունը բացասաբար է անդրադառնում ներդրողների տրամադրությունների վրա:
Ոստիկանության կողմից արցունքաբեր գազով հարձակվելուց հետո ցուցարարները զինվել են անձրևանոցներով, պոլիէթիլենով և ձեռքի տակ եղած այլ իրերով, որոնք թույլ կտան պաշտպանվել գազից: Այդ պատճառով շատերը սկսել են բողոքի ակցիան անվանել «Անձրևանոցների հեղափոխություն»:































