Ամերիկացուն ցմահ ազատազրկում է սպառնում բարձր երաժշտության պատճառով սևամորթ տղայի սպանելու համար (լուսանկարներ)
Ֆլորիդայում բնակվող Մայքլ Դանին ցմահ ազատազրկում է սպառնում բարձր երաժշտության շուրջ վիճաբանության ժամանակ սպանված դեռահասի գործով, գրում է Yahoo News-ը։
17-ամյա Ջորդան Դեյվիսը 3 հրազենային վնասվածք է ստացել բենզալցակայանում վիճաբանության ժամանակ։ Ըստ Մայքլ Դանի՝ նա մոտեցել է դեռահասների մեքենային և հրամայել է անջատել երաժշտությունը, երբ դեռահասը հրաժարվել է դա անել, նա կրակել է տղայի վրա։
Մի շարք իրավապաշտպաններ գտնում են, որ սպանությունը տեղի է ունեցել ռասայական ատելության հողի վրա։
Ոստիկանությունը դեռահասի մեքենայում ոչ մի տեսակի զենք չի հայտնաբերել, իսկ ականատեսները պնդում են, որ դեռահասը չի սպառնացել կամ վտանգ ներկայացրել 47-ամյա տղամարդու համար։
Գործով դատախազ Էրին Վոլֆսոնը նշել է, որ դատապարտելի է Դանի արարքը, քանի որ նա չի կրակել վիրավորելու համար, նա չի կրակել մեքենայի անիվներին կամ պատուհաններին, նա կրակել է սպանելու նպատակով։
Նմանատիպ դեպք կրկին ռասայական խտրականության հողի վրա տեղի է ունեցել ԱՄՆ-ի Ֆերգյուսոն քաղաքում, երբ ոստիկանն ավելի քան 10 անգամ կրակել և սպանել է անզեն սևամորթ տղայի։

















