Պուտինը հայտարարել է, որ չի պատրաստվում միջամտել Լևոն Հայրապետյանին առնչվող «Բաշնեֆտ»-ի գործին

17:27 • 02.10.14

ՌԴ նախագահ Վլադիմիր Պուտինը Մոսկվայում «ВТБ Капитал»-ի «Россия Зовет!» համաժողովի ժամանակ հայտարարել է, որ չի պատրաստվում միջամտել «Սիստեմա» ընկերության տնօրենների խորհրդի նախագահ Վլադիմիր Եվտուշենկովի գործին, ում մեղադրում են հանցավոր ճանապարհով ձեռք բերված սեփականության օրինականացման համար, հաղորդում է kommersant.ru-ն:

 

«Դա բացարձակապես չի նշանակում, որ պետությունը նպատակադրվել է զանգվածային կերպով սեփականաշնորհման արդյունքների վերանայում սկսել, նման բան հաստատ չի լինի»,- հավելել է նա:

 

Ռուսաստանի քննչական կոմիտեի վարկածով՝ Վլադիմիր Եվտուշենկովը, ով 2009 թվականին բաշկիրական վառելիքաէներգետիկ համալիրի մի քանի ձեռնարկություն է գնել դրանք յուրացրած Ուրալ Ռախիմովից՝ հանրապետության նախկին նախագահի որդուց, այդկերպ կազմակերպել է հանցավոր գործողությունների արդյունքում երրորդ անձի կողմից ձեռք բերված սեփականության օրինականացումը:

 

Հիշեցնենք, որ սեպտեմբերին տնային կալանք էր սահմանվել ամենահարուստ մարդկանցից մեկի՝ «Սիստեմա» ընկերության տնօրենների խորհրդի նախագահ Վլադիմիր Եվտուշենկովի նկատմամբ: Այս կալանքը, ի թիվս այլնի, առնչվում է հայազգի գործարար Լևոն Հայրապետյանի ձերբակալությանը, որն իր հերթին կապվում է «Բաշնեֆտի»՝  «Սիստեմայի» դուստր ընկերության գործով հետաքննության հետ: