Գոռ Առաքելյանը սպանելու նպատակ չի ունեցել, ու կրակոցները ներքև են ուղղված եղել. «Վերնիսաժի» գործով մեղադրյալի պաշտպան
Գոռ Առաքելյանի պաշտպան Երեմ Սարգսյանը, անդրադառնալով «Վերնիսաժի» գործով Գոռ Առաքելյանի ձերբակալմանը, ասաց, որ Գոռ Առաքելյանը սպանելու նպատակ չի ունեցել, և նրա բոլոր կրակոցները ներքև են ուղղված եղել: Նա գտնում է, որ իրավասու մարմինները ո՛չ թե իրավաբանությամբ են առաջնորդվում, այլ՝ ինչ-ինչ նկատառումներով:
«Նկատելի է, որ հասարակական հնչեղություն ունեցող դեպքերում իրավասու մարմինների մոտ պարալիզացվում է իրավաբանական մտածելակերպը և այնպիսի տպավորություն է, թե PR մենեջերներն են որոշում կայացնում»,- մամուլի ասուլիսին ասաց նա:
Նա նշեց, որ Ներսես Մելքոնյանի մոտ առկա է եղել 4 հրազենային վնասվածք՝ ոտքի վրա, և եթե իրար դիմաց կանգնած 4 կրակոց է արձակվում ոտքին և ոչ թե կենսական այլ օրգաններին, ապա դա նշանակում է, որ սպանության նպատակ չի եղել:
Ինչ վերաբերում է Վալերի Հովհաննիսյանի վնասվածքներին, ապա պաշպանն ասաց, որ վերջինս եղել է մեքենայի մեջ և կրակոցներից մեկը նրա որովայնին է դիպչել, որը նստած դիրքի կամ շարժման արդյունք է եղել, իսկ մյուս վնասվածքը եղել է ոտքի վրա: Ըստ նրա, եթե ատրճանակում փամփուշտներ են մնացել, դա ևս նշանակում է, որ սպանության նպատակ չի եղել:
«Գոռ Առաքելյանը գործել է անհրաժեշտ պաշտպանությունից ելնելով: Գոռ Առաքելյանը եղել է մենակ, նրանք՝ երկուսով ու ֆիզիկապես ավելի պատրաստված, հաղթանդամ: Էական է, որ Գոռ Առաքելյանի հետ գտնվել են կինը և երեխան, ով ամբողջ վիճաբանության ժամանակ լացել է»,- ասաց Երեմ Սարգսյանը և ավելացրեց, որ նախաքննության մարմինները անտեսել են հոգեկան խիստ հուզմունքի վիճակը:
«Պետական մարմինները ցույց են ուզում տալ, թե տեսեք ինչ խիստ ենք վերաբերվում»,- ասաց նա և ավելացրեց, որ իր բոլոր միջնորդությունները մերժվել են:










