Հայաստանը կմասնակցի խորհրդային և ռուսական կրկեսի 95-ամյակի միջոցառումներին

Մոսկվայում նշելու են խորհրդային և ռուսական կրկեսի հիմնադրման 95-րդ տարեդարձը: Տոնական միջոցառումներին, որպես Պատվավոր հյուր հրավիրված է և կմասնակցի նաև Հայաստանի կրկեսային գործիչների միության նախագահ, Երևանի կրկեսի գեղարվեստական ղեկավար Սոս Պետրոսյանը: Այս մասին հայտնում են Հայաստանի կրկեսային գործիչների միության մամուլի ծառայությունից։ 

Հաղորդագրության մեջ ասվում է. «Հոբելյանական միջոցառումների ծրագրում նախատեսված է կրկեսային արվեստի զարգացման խնդիրներին նվիրված խորհրդաժողով, որի շրջանակներում Սոս Պետրոսյանը կներկայացնի հայկական կրկեսի մասին իր թեզը, որտեղ նա անդրադառնում է հայկական ժամանակակից կրկեսային արվեստին և գեղարվեստական արժեքներին: 

Խորհրդաժողովի Պատվավոր հյուրերը՝ տարբեր երկրների կրկեսային գործիչները նմանապես կհանդիպեն նաև Միխայիլ Ռումյանցևի («Կարանդաշ») անվան կրկեսային և էստրադային արվեստի պետական ուսումնարանի սաների և դասախոսական կազմի հետ: Այս ուսումնարանում է 60-ականների կեսերին ուսանել նաև Սոս Պետրոսյանը: Եվ կազմակերպվելիք «վարպետության դասերի» շրջանակում Սոս Պետրոսյանն սկսնակ արտիստներին կպատմի իր անցած ուղու և կուտակած փորձի մասին: 

Հոբելյանական Գալա-ներկայացումը նախատեսված է հոկտեմբերի 11-ին՝ Ցվետնոյ բուլվարի Նիկուլինի անվան Մոսկովյան կրկեսում: Հեքիաթաշուք շոուն, ինչպես խոստանում են կազմակերպիչները, իր յուրահատկությամբ կտպավորի ինչպես շարքային հանդիսատեսներին, այնպես էլ՝ մանեժի անվանի վարպետներին:

Գալա-ներկայացումը ներառելու է ամենատարբեր կրկեսային ժանրերի ներկայացուցիչների. հանդիսատեսին կցուցադրվեն տաչանկայով նժույգների վազք, օդային մարմնամարզիկների, էկվիլիբրիստների, ձեռնածուների և այլ արտիստների ելույթներ»: