Կալանավորված ադրբեջանցի իրավապաշտպան Լեյլա Յունուսը Եվրախորհրդարանի Սախարովի անվան մրցանակի է հավակնում
Եվրախորհրդարանի երկու մասնագիտացված հանձնաժողովները քվեարկել են 2014 թվականի Անդրեյ Սախարովի անվան մրցանակի համար՝ ընտրելով երեք թեկնածուի, հաղորդում է contact.az-ը:
Անցկացված քվեարկությունից հետո ցանկում է մնացել 3 թեկնածու՝ Ուկրաինայից Եվրամայդան շարժումը, Կոնգոյից բժիշկ Դենիզ Մուկվեգեն և Բաքվից Խաղաղության և ժողովրդավարության ինստիտուտի ղեկավար Լեյլա Յունուսը:
Վերջնական քվեարկությունը կանցկացվի հոկտեմբրեի 16-ին խորհրդարանի ընդհանուր հավաքի ժամանակ:
Մրցանակը կհանձնվի նոյեմբերի 26-ին:
Ի դեպ, օրերս Նորվեգիայի Հելսինկյան կոմիտեն իր սահմանած Անդրեյ Սախարովի անվան «Ազատության» մրցանակի էր արժանացրել Ադրբեջանում բանտարկված քաղաքական ակտիվիստներին, այդ թվում՝ Լեյլա Յունուսին:
Ավելի վաղ Ադրբեջանում կալանավորված մարդու իրավունքների պաշտպան Լեյլա Յունուսի փաստաբանները նրա առողջական վիճակի վատացման մասին հայտարարություն էին տարածել: Ըստ փաստաբանների՝ նրան պահում են ցուրտ խցում, որտեղ տաք ջրի հասանելիություն չկա։ Նման պայմանները նախկինում 4 վիրահատության ենթարկված կնոջ վիճակի վատթարացմանն են հանգեցրել։










