«Իսլամական պետության» գրոհայինները կրթված կանանցից ավելի շատ են վախենում, քան օդային հարվածներից. De Telegraaf
«Իսլամական պետություն» ծայրահեղական խմբավորման գրոհայինները կրթված կանանցից ավելի շատ են վախենում, քան ԱՄՆ ռազմաօդային ուժերի օդային հարվածներից: Նման պնդմամբ է հանդես եկել նիդեռլանդական De Telegraaf թերթը, հաղորդում է ТАСС-ը:
«Նրանք ցանկանում են խալիֆայություն հիմնել և ստեղծել չկրթված և ճնշված հասարակություն։ Իրենց տեսակետն են պարտադրում կրոնական դպրոցներում բնակչության փոքր հատվածին (տղաներին) և աղջիկներին տգիտության մեջ պահում: Դա հետագայում ատելություն է ծնում»,- գրում է թերթը:
Մասնավորապես, թերթը համեմատում է «Իսլամական պետությանը» «Թալիբան» շարժման հետ, որի գրոհայինները փորձել են սպանել պակիստանցի ակտիվիստ Մալալա Յուսուֆզային՝ 2014 թվականի խաղաղության Նոբելյան մրցանակի դափնեկրին միայն այն բանի համար, որ նա դպրոց էր հաճախում:
Թերթի կարծիքով՝ «Իսլամական պետության» գրոհայինները նման բաներ են անում ավելի մեծ մասշտաբներով: «Այդ անխիղճ մարդիկ վախենում են գրքով կանանցից ավելի, քան ամերիկյան օդային հարվածներից»:
Հոկտեմբերի 10-ին պակիստանցի իրավապաշտպան Մալալա Յուսուֆզայը դարձել է պատմության մեջ ամենաերիտասարդ խաղաղության Նոբելյան մրցանակակիրը։










