Թուրքիայում 3 գերմանացի լրագրող է ձերբակալվել
Թուրքական ոստիկանությունը ձերբակալել է Գերմանիայից 3 ֆոտոլրագրողի։ Այդ մասին հայտնի է դարձել երեկ ԶԼՄ-ների աշխատակիցներից և ակտիվիստներից, հայտնում է Deutsche Welle-ն։
«Թղթակիցներ առանց սահմանների» միջազգային իրավապաշտպան կազմակերպությունը և քուրդ ակտիվիստները հաստատել են այդ տեղեկությունը։ Լրագրողների ձերբակալությունը տեղի է ունեցել Դիարբեքիր քաղաքում՝ Թուրքիայի հարավ-արևելքում։ Բացի գերմանացի լրագրողներից ձերբակալվել են նաև ԶԼՄ-ներ 2 այլ աշխատակիցներ տարբեր երկրներից։
Լրագրողները կասկածվում են որպես «սադրիչներ» հանդես գալու համար։ Գերմանիայի ԱԳՆ ներկայացուցչի խոսքով՝ Անկարայում գերմանական դեսպանատունն աշխատում է իրավիճակի պարզաբանման ուղղությամբ, մասնավորապես՝ «կապ է պահում ինչպես Գերմանիայի քաղաքացիների, այնպես էլ իրավասու գերատեսչությունների հետ»։
Ձերբակալված գերմանացի լրագրողներից մեկը Twitter-ում գրել է, որ ինքը և իր 2 գործընկերները ձերբակալվել են, «քանի որ ցանկացել են լուսաբանել քրդերի բողոքի ցույցերը»։
Դիարբեքիր քաղաքը, որտեղ գտնվել են լրագրողները, քրդերի բողոքի ցույցերի կենտրոններից մեկն է։










