Իրենք ոչ թե ուզում էին թեժ աշուն, այլ աշխատեցին, որ աշունը չթեժանա. Սասուն Միքայելյան
Խորհրդարանական ոչ իշխանական ուժերը ոչ թե ուզում են թեժ աշուն, այլ աշխատեցին, որ աշունը չթեժանա. այս մասին այսօր «Քաղաքացիական պայմանագիր» հասարակական-քաղաքական միավորման կառավարման խորհրդի անդամների ասուլիսին հայտարարեց «Սասուն» ջոկատի հրամանատար Սասուն Միքայելյանը:
«Էդպես էլ եղավ, ու ինչպես պարոն Փաշինյանը նշեց, իրենք պահում են դաշտը, որ նոր քաղաքական ուժ չծնվի մինչև քաղաքական կամ խորհրդարանական ընտրությունները: Ինչ վերաբերում է Սահմանադրությանը, 98-ից մինչ այսօր բոլոր նախագահները քանի՞ անգամ են շրջանցել Սահմանադրությունը և արել այն, ինչ իրենց է պետք»,-հայտարարեց Սասուն Միքայելյանը:
Նա հավելեց, որ վերջին 20 տարում հասարակությունը համոզվել է, որ սահմանադրորեն հնարավոր չէ իշխանություն փոխել ու «եթե մենք չենք կարողանում սահմանադրորեն իշխանություն փոխել, մենք կգնանք թավշյա հեղափոխության»:
Հիշեցնենք, որ «Քաղաքացիական պայմանագրի» կառավարման խորհուրդը, գնահատելով 2014թ. հոկտեմբերի 10-ին Երևանի Ազատության հրապարակում ոչ իշխանական ուժերի կազմակերպած հանրահավաքը, նշել էր, որ ոչ իշխանական ուժերի անունից բաց տեքստով Սերժ Սարգսյանի վարչախմբին առաջարկվեց սակարկել քաղաքական իշխանության կիսման, բաժանման, փոխանցման շուրջ:










