Մեկ տարի է անցել Վարդան Պետրոսյանի մասնակցությամբ ավտովթարից

20:27 • 20.10.14

Ուղիղ մեկ տարի է անցել Եղվարդ-Երևան ավտոճանապարհին դերասան Վարդան Պետրոսյանի մասնակցությամբ տեղի ունեցած ավտովթարից, ինչի հետևանքով մահացել էին վթարին մասնակից «Նիվա» մակնիշի մեքենայի ուղևորներից երկու հորեղբորորդիներ՝ Էդվարդ և Էդգար Հակոբյանները։ 

Շուրջ 8 ամիս ընթացող դատավարության ընթացքում հարցաքննվել են առանցքային վկաները, ցուցմունք է տվել նաև ամբաստանյալ Վարդան Պետրոսյանը: 

Հիշեցնենք, որ Վարդան Պետրոսյանի նկատմամբ մեղադրանք առաջադրվեց ՀՀ Քրեական օրենսգրքի 242-րդ հոդվածի 3-րդ մասի հատկանիշներով, գործը վարույթ է ընդունվել 2014թ. փետրվարի 20-ին և դատական քննություն է նշանակվել մարտի 12-ին: 

Tert.am-ի հետ զրույցում տուժող կողմի և ամբաստանյալի փաստաբանները, ինչպես նաև իրավապաշտպան Ժաննա Ալեքսանյանը, ով ներկա է բոլոր դատական նիստերին, իրենց կարծիքն են հայտնել դատավարության ողջ ընթացքի, կողմերի հնարավոր հաշտեցման և այլ հարցերի շուրջ: 

Տուժող կողմի ներկայացուցիչ Ռուբեն Բալոյանի կարծիքով՝ ամբողջ ընթացքը ցույց է տվել, որ փորձ է արվում իրականությունը խեղաթյուրել. «Խոսքը վերաբերում է պաշտպանական կողմին: Բավական երկար ժամանակ խեղաթյուրվում է այն ամենն, ինչ իրականում կա: Այսօր ես բոլորին էլ բացատրում եմ այն, ինչ կա լուսանկարների մեջ, իսկ ամբաստանյալի փաստաբան Նիկոլայ Բաղդասարյանի կողմից 3D տարբերակով խեղաթյուրվում են այն հետքերը, ինչ երևում են նկարների մեջ»: 

Ըստ նրա՝ դատական պրոցեսը երկարաձգվում է տարբեր պատճառներով։ «Մեկ ամսից ավելի տարբեր միջնորդություններով շահարկվեց, թե «Նիվա» մեքենան կողային հայելի չի ունեցել, որը վթարի հետ պատճառական կապի մեջ չի: Մեկ ամիս շահարկվեց, որ երեխաները մահացել են գազի բալոնի հետևանքով: Ես հաստատապես հայտարարում եմ, որ դա ևս վթարի և երեխաների մահվան հետ ընդհանրապես կապ չունի: Շահարկվեց, որ մեքենայի հետի մասում 4 ուղևոր են, դա ևս վթարի հետ կապ չունի: Այս ամեն ինչը կարելի՞ էր այսքան շահարկել, դատաքննությունը մեխանիկական եղանակով ձգձգվում է: Իմ մոտ արդեն հոգնածություն է առաջացել, ես արդեն այս դատաքննությունը չեմ ուզում լսել,-ասաց նա,-ինչ վերաբերում է կողմերի հաշտեցմանը և հետագա հարաբերություններին, ես հիմա հաշտեցում չեմ տեսնում, և իրենք էլ չեն ուզում հաշտվել: Եթե այսօր իրենք ասում են, որ Վարդան Պետրոսյանն անմեղ է, «Նիվան» հետընթաց է կատարել, իր դիմացը փակել է, սա ի՞նչ է նշանակում, որ իրենք ոչ վնաս են հատուցելու, ոչ էլ իրենց պետք է այդ հաշտեցումը: Այսինքն, ստացվում է, որ այսքան ժամանակ այս ամենը ձևական էր, այս հաշտեցման տասից ավելի հանդիպումները և այլն, սրանք լրիվ սցենար են»:

Իրավապաշտպան Ժաննա Ալեքսանյանն ասաց, թե շատ է ցավում տեղի ունեցածի համար։ 

«Եթե համեմատելու լինենք անմիջապես վթարից հետո այն աղմուկին և այն անհասկանալի քաոսային վիճակին, ի սկզբանե պարզ չէր, թե ինչ է տեղի ունեցել, և շատ հակասական էին այդ աղմուկները, փոխադարձ կարծիքները, որոնք շատ հաճախ բախվում էին, և դա բացասաբար էր անդրադառնում Վարդան Պետրոսյանի վրա: Հանրության համար էլ անհասկանալի էր, թե ինչ է իրականում տեղի ունեցել։ Հարցը, թե նա խմած եղե՞լ է, թե՞ ոչ, հեռախոսով խոսե՞լ է, թե՞ ոչ, շատ շահարկվում էր տուժող կողմի ներկայացուցչի կողմից և կարծում եմ՝ նա դիտավորյալ քարոզչություն էր անում, որպեսզի Վարդան Պետրոսյանը վարկաբեկվի»,-ասաց իրավապաշտպանը:

Ըստ նրա՝ Վարդան Պետրոսյանի հասցեին հնչող մեղադրանքներն իսպառ ի չիք դարձան։ «Դրանք գոյություն չեն ունեցել, և այդ մասին շատ լավ տեղյակ է եղել նաև գործին մասնակցող տուժող կողմի ներկայացուցիչը, ով իրավաբան է, և շատ լավ այդ քարոզչությունը տանում է: Ինչպես գիտենք, Վարդան Պետրոսյանն իրեն մեղավոր չի ճանաչել, և այս ամբողջ դատական գործընթացը ցույց է տալիս, որ նա իրոք մեղավոր չի եղել,-ասաց նա,-նախաքննական մարմինը շատ վատ է աշխատել, աշխատել է Վարդան Պետրոսյանի դեմ: Ամենասկզբում ես կարծում էի, թե միտում չկար, բայց այն միտումնավոր խեղաթյուրել է դեպքի վայրը: Հակված եմ մտածելու, որ շատ անփույթ են աշխատել ոստիկանության աշխատակիցները: Կարծում եմ, որ պետք է Վարդան Պետրոսյանին անհապաղ ազատ արձակեն, քանի որ նա չի պատրաստվում հանրապետությունից փախչել: Եթե դատարանն օբյեկտիվ գնահատական տար դատարանում ձեռք բերված ապացույցներին, պետք է ազատ արձակեր նրան: Դա դիտավորյալ սպանություն չէ, և ինչպես մի անգամ դատարանում Վարդան Պետրոսյանն ասաց, իրեն քննել ու իր հետ վարվել են այնպես, կարծես դիտավորյալ սպանություն կատարած հանցագործի: Ոչ մի հիմք չունեն նրան անազատության մեջ պահելու, նա չի խուսափում պատասխանատվությունից: Վարդանն իր ցուցմունքները պետք է ազատության մեջ տար: Ինչևէ, ամեն ինչ կախված է նրանից, թե դատարանն ինչ որոշում կկայացնի»:

Վարդան Պետրոսյանի պաշտպան Նիկոլայ Բաղդասարյանը Tert.am-ի հետ զրույցում ասաց հետևյալը. «Մինչև չփորձենք առերեսվել ճշմարտության հետ, մինչև չիմանանք, թե ո՞րն է օբյեկտիվ ճշմարտությունը, շատ դժվար է այս գործով գտնել այն հաշտության եզրերը, որոնք անհրաժեշտ են, որպեսզի երկու կողմերը գան հաշտության համաձայնության: Երկու կողմերը 180 աստիճան տարբեր են ներկայացնում, թե ինչ է եղել իրենց հետ: Մի կողմը պնդում է, որ իրենք կանգնած են եղել, և Վարդան Պետրոսյանն է դուրս եկել կողնակ ու հարվածել իրենց, Վարդան Պետրոսյանն էլ պնդում է, որ բանուկ մասում է եղել և «Նիվան» հետընթաց է կատարել: Այստեղ պետք է, որ պետական մարմինները նախաձեռնեին ամեն ինչ, որպեսզի օբյեկտիվ ճշմարտությունը պարզվեր, սակայն, ցավոք, դրանք փոխարենն աջակցեն օբյեկտիվ ճշմարտության բացահայտմանը, իրենք խոչընդոտել են պաշտպանական կողմին այդ ճշմարտության բացահայտման ճանապարհին: Դրա պատճառով էլ այս մեկ տարվա ընթացքում շատ բուռն դատաքննություն ունեցանք, ինչի փոխարեն կարող էինք ունենալ շատ սահուն քննություն, որը նաև կհանգեցներ երկու կողմերին էլ հաշտության եզրեր գտնելուն»:

Ամբաստանյալի փաստաբանը հավելեց. «Մի կողմից ոստիկանների ցուցմունքները, որ իրենք կատարել են չափագրումներ, մյուս կողմից ունենք Գագիկ Շամշյանի կողմից կատարած վիդեոնկարահանումներ, որտեղ երևում է, որ իրենք չափագրումներ չեն իրականացնում, որի՞ ն հավատանք հիմա: Ոստիկանները հո գիտեն, որ չափագրումներ չեն իրականացրել, ինչ-որ մեկը նախաձեռնել է, չէ՞, որ իրենք գան ասեն, որ կատարել են չափագրումներ, 2 հոգի էլ ընթերակա է եղել... Ինչ-որ մեկը փոխանակ վիդեոն նայեր, իմաստը ո՞րն է, ես դա չեմ կարողանում հասկանալ, այդ մանր հարցերում է չենք կարողանում օբյեկտիվ ճշմարտությանը հասնել»:

Նիկոլայ Բաղդասարյանը նշեց, որ իրականում շատ ցավում է այս դեպքի հետ կապված. «Եթե օբյեկտիվ քննություն կատարեին, կպարզվեր, որ դեպքի համար շատ մեծ պատճառներ, պայմաններ է հանդիսացել պետության ներսում սխալ կազմակերպված ճանապարհային երթևեկությունը: Եթե ճանապարհային երթևեկությունը ճիշտ կազմակերպված լիներ, այսինքն՝ համապատասխան գծանշումները, ինժեներական կառույցները լինեին, հաստատ այդ վթարը չէր լինի և անվտանգ կլիներ երթևեկությունը: Սակայն, մեզ մոտ, ստացվում է, որ մարդիկ են մահանում, և ոչ ոք չի ցանկանում ընդունել պետության սխալը այդտեղ, տուժողները միշտ մեղադրում են մյուս վարորդին, մյուս վարորդն ուզում է պաշտպանվել՝ մեղադրում է մյուս վարորդին, սակայն ոչ ոք չի ասում, որ պետությունը այստեղ ևս մեղք ունի: Պետությունն էլ պետք է որոշակի պատասխանատվություն կրի սխալ կազմակերպված երթևեկության համար»: 

Հիշեցնենք, որ եզրակացության մեջ ասվում է, որ Վարդան Պետրոսյանը մեղադրվում է այն բանում, որ 2013թ. հոկտեմբերի 20-ին Եղվարդ-Երևան ճանապարհին իր անձնական օգտագործման «ԲՄՎ-320» մակնիշի մեքենան վարել է Կոտայքի մարզի Սարալանջ գյուղի կողմից դեպի Երևան քաղաքի ուղղությամբ, հասնելով Եղվարդ-Երևան ավտոճանապարհի 2-րդ կմ հատվածին՝ իրականացրել է ոչ պատշաճ և վտանգավոր երթևեկություն՝ ավտոմեքենան վարել է բնակավայրում սահմանված թույլատրելի առավելագույնը գերազանցող` առնվազն 71 կմ/ժ արագությամբ և առջևի մասով ընդհարվել է հողածածկ կողնակում կանգնած վիճակում գտնվող «Վազ 21214» մակնիշի մեքենայի հետևի մասին: Վթարի հետևանքով «Վազ-21214» մակնիշի մեքենայի ուղևորներ էդվարդ Արթուրի Հակոբյանը և էդգար Հայկի Հակոբյանը մահացել են, իսկ Տաթևիկ Արթուրի Հակոբյանի առողջությանը հասցվել է ծանր վնաս: Հայկ Մարտիրոսի Հակոբյանի, էմմա Հայկի Հակոբյանի, ինչպես նաև ավտովարորդ Արթուր Մարտիրոսի Հակոբյանի առողջությանը հասցվել է միջին ծանրության վնաս՝ առողջության տևական քայքայմամբ: