Թուրքիայում պետականության դեմ ակցիաները կարգելվեն. Դավութօղլու

16:52 • 21.10.14

Թուրքիայում ակցիաներ անցկացնելու հարցում բարեփոխումներ են տեղի ունենալու՝ քաղաքացիների անվտանգությունն ապահովելու նպատակով, հայտարարել է Թուրքիայի վարչապետ Ահմեթ Դավութօղլուն:

 

Ինչպես տեղեկացնում է TRT Haber հեռուստաընկերության կայքը, վարչապետն ասել է, որ բարեփոխումների շրջանակում արգելվելու է պետականության դեմ ցանկացած ակցիա, որը սպառնալիք է ժողովրդի կյանքի համար:

 

Դավութօղլուն նշել է, որ ակցիաների ընթացքում արգելվելու է դիմակներ կրել. դա գնահատվելու է որպես սպառնալիք: Իսկ «Մոլոտովյան կոկտեյլի» կիրառումը դիտարկվելու է որպես զենքի օգտագործում:

 

«Մենք թույլ չենք տա, որ այս հողերը Քերբալայի (նկատի ունի Իրաքի Քերբալա քաղաքը-Tert.am) վերածվեն: Ոչ մի դեպքում էթնիկ հիմքով սպանություններ տեղի չեն ունենալու, մարդասպաններն այս հողի վրա տեղ չեն ունենալու: Դա պետք է ի գիտություն ընդունեն»,-ասել է նա:

 

Թուրքիայի վարչապետը նշել է, որ ոչ ոք զենքով ցույցերի մասնակցելու իրավունք չունի, և ցույցերին զինված մասնակցելու պատիժը 2.5 տարվա փոխարեն դառնալու է 4 տարի:

 

Արմատական փոփոխություններ են տեղի ունենալու նաև ոստիկանական համակարգում, իսկ թմրավաճառները գրանցվելու են որպես ահաբեկիչներ: