UWC-ի Հոնկոնգի քոլեջի աշակերտները հայկական տոլմա են պատրաստել (լուսանկարներ)
Հոնկոնգում գործող UWC (Միացյալ աշխարհի քոլեջներ) Լի Պո Չունի քոլեջում սովորող հայ աշակերտները մյուս երկրներից ժամանած երեխաների հետ միասին հայկական տոլմա են պատրաստել: Ինչպես հաղորդում է «Արմենպրես»-ը, հայ աշակերտները միաժամանակ օտարերկրյա ուսանողներին սովորեցրել են հայկական պարերը, որոնք նրանք կատարել են միասին:
UWC-ը (Միացյալ աշխարհի քոլեջներ) հիմնադրվել է 1962 թ.: Կրթական մեծ փորձի վրա հիմնված UWC ծրագրերի նպատակն է ամբողջ աշխարհից ուսանողների կրթությունը կազմակերպել՝ ոգեշնչելով նրանց ստեղծելու նոր ապագա: UWC դպրոցներում և քոլեջներում աշակերտները ոչ միայն սովորում են միջմշակութային միջավայրում և բացահայտում աշխարհը, այլ նաև իրենց մեջ կերտում են պատասխանատվության և փոխադարձ օգնության զգացում: Ներկայումս, UWC համակարգում գործում են աշխարհի տարբեր երկրներում տեղակայված 14 դպրոցներ և քոլեջներ: Յուրաքանչյուր տարի, UWC ծրագրերով ուսանում են շուրջ 7500 աշակերտ: Սկսած 1962 թ.՝ UWC դպրոցներում և քոլեջներում տարբեր ծրագրերով ուսանել են ավելի քան 50 000 աշակերտներ՝ 181 երկրներից: Տարբեր երկրներից աշակերտներ ընտրվում են քոլեջներ իրենց երկրի Ազգային կոմիտեների կողմից: Ներկայումս, UWC համակարգում աշխատում են աշխարհի տարբեր երկրներում 140 Ազգային կոմիտեներ:
Հոկտեմբերի 11-ին Հայաստանում պաշտոնապես բացվեց համակարգի UWC Դիլիջան քոլեջը, որտեղ աշխարհի 48 երկրից սովորելու է եկել 96 աշակերտ:













