Ազատության հրապարակում եռյակի հանրահավաքն ավարտվեց երթով

Ուղիղ եթերը՝ «Ազատություն» TV–ի




 

20.30

Միացում, ծափեր, թմբուկներ. եռյակը երթ անցկացրեց 

Եռյակի՝ այսօր տեղի ունեցած հանրահավաքը Ազատության հրապարակում, ինչպես նախորդ անգամ, եզրափակվեց մասնակիցների երթով, որի սկզբնամասը, վերջնամասն ու կողային մասերը առնված էին մի հսկայական եռագույնի մեջ, ինչը նաև երթի մասնակիցներին սովորական անցորդներից էր սահմանազատում: Որոշ փողոցներում ՝ մասնավորապես, Մաշտոցի սկզբնամասում երթի մասնակիցներ «Մի-ա-ցում» և այլ կարգախոսներով սկսեցին նաև ծափահարել, իսկ որոշ պատշգամբներից իրենց նայող քաղաքացիներին դիմում էին միանալու կոչերով։ 

«Բարգավաճ Հայաստան» կուսակցության նախագահ Գագիկ Ծառուկյանը և ԲՀԿ մյուս առաջնորդները բոլոր չորս կողմերից օղակված էին ամրակազմ երիտասարդներով: 

Երթն անցնում է Ազատության հրապարակ-Մաշտոցի պողոտա-Ամիրյան փողոց-Հանրապետության հրապարակ-Նալբանդյան փողոց-Թումանյան փողոց-Ազատության հրապարակ երթուղով:

19.17

Այսօր ասում եմ՝ ոչ մի նստացույց չի լինելու, մինչև մենք եռյակով ընդհանուր պայմանավորվածության չգանք. Գագիկ Ծառուկյան

«Բարգավաճ Հայաստան» կուսակցության ղեկավար Գագիկ Ծառուկյանը ելույթ ունենալով Ազատության հրապարակի հարթակից, ասաց, թե այսօր իրեն ոչ մի դժվարագույն խնդրով չեն կարող վախեցնել:

«Ծառուկյանն ամեն ինչ տեսել է, դժվարություն, նեղություն, անարդարություն, բայց երբեք չի կոտրվել և մինչև վերջ իր գործն առաջ է տարել: Սիրելի՛ ժողովուրդ, ես այսօր այստեղ եմ: Ճիշտ է, արդեն մոտ 8-10 տարի ասում են, թե Ծառուկյանը չի անի, Ծառուկյանի ինչին պետք է, այո՛, իրենք ճիշտ են ասում, Ծառուկյանի ինչին պետք է, որ անցավ գլուխը դնի ցավի տակ: Բայց Ծառուկյանը ձեր կողքին է»,-հայտարարեց Գագիկ Ծառուկյանը:

Նա նշեց, թե մի քանի դրույթներ է ուզում կարդալ. «Ակնհայտ է, որ երկիրը գտնվում է ծանրագույն վիճակի մեջ: Վերջին տարիներին Հայաստանի տնտեսությունը հասցվել է կաթվածահար վիճակի: Որպես հետևանք մենք այսօր ունենք աղքատության ահռելի մակարդակ և արտագաղթի վտանգավոր ցուցանիշներ: Օրեցօր խորացող քաղաքական մենաշնորհն էլ ավելի է սրել երկրում առկա անվստահությունը և անհանդուրժողականությունը»:

Նրա խոսքով՝ այսօր իշխանությունը չի առաջարկում երկրի զարգացման և առողջացման որևէ խելամիտ և հավատ ներշնչող ծրագիր, ինչը նշանակում է, որ մարդկանց կյանքն ավելի է վատանալու: « Ու հենց այս պահից իշխանությունն առաջ է քաշում սահմանադրական փոփոխությունների իր գաղափարը, որպեսզի վերարտադրվի և շարունակի Հայաստանը կառավարել նույն մեթոդներով և նույն մարդկանցով: Այս վճռական պահին ժողովուրդն իր վերաբերմունքը պետք է հստակ արտահայտի: Մենք՝ 3 քաղաքական ուժերս, գիտակցում ենք այն լրջագույն պատասխանատվությունը, որը ստանձնել ենք: Ես՝ որպես «Բարգավաճ Հայաստան» կուսակցության նախագահ, վստահեցնում եմ, որ ձեզ հետ միասին մենք իրականացնելու ենք հանրային համաժողովրդական պահանջը: Հայաստանը զարգացման և վերելքի ուղու վրա դնելու համար անհրաժեշտ են նոր որակի իշխանություն և նոր քաղաքականություն»,– ասաց նա:

«Որպես առաջատար ուժի ղեկավար ես հայտարարում եմ, որ «Բարգավաճ Հայաստան» կուսակցությունը երկրի ներսում չունի ներքին թշնամիներ: Անկախ բոլոր քաղաքական փոփոխություններից՝ պետական համակարգն իրենք է զգա պաշտպանված և աշխատի հանդարտ մթնոլորտում: Որևէ մեկի մոտ կասկած չպետք է լինի, որ հոկտեմբերի 10-ին մեկնարկած այս համաժողովրդական շարժման այս ալիքով մենք հասնելու ենք մեր նպատակների իրականացմանը: Այսօրվանից սկսած մենք ողջ Հայաստանում սկսում ենք համաժողովրդական շարժման միասնական շտաբների ձևավորում՝ ցանկացած պահի ժողովրդին մոբիլիզացնելու համար»,– հայտարարեց նա:

ԲՀԿ ղեկավարը նաև նշեց, որ իրենք վերահաստատում են իրենց պահանջները՝ ռացիոնալ քննարկումների դաշտում, հստակ ժամանակացույցով լուծել այդ խնդիրները: «Եթե իշխանությունը շարունակի անտեսել և մերժել համաժողովրդական շարժման արդարացի պահանջները, ապա մենք՝ 3 քաղաքական ուժերով և ժողովրդական շարժմամբ՝ փողոցում և հրապարակներում կանգնած հարյուր հազարներով կպարտադրենք իշխանափոխություն, նոր իշխանության ստեղծում և արտահերթ ընտրություններ: Այսօր ասում եմ՝ ոչ մի նստացույց չի լինելու, մինչև մենք եռյակով ընդհանուր պայմանավորվածության չգանք, եթե դրա կարիքը լինի, մյուս հանրահավաքին այդ հարցը կբարձրացնենք»,– հայտարարեց նա:

19.09

Ր. Հովհաննիսյանն առաջարկեց, որ վարչապետն ու նախագահը հրաժարական տան, ստեղծվի ժամանակավոր կառավարություն

«Ժառանգություն» կուսակցության առաջնորդ Րաֆֆի Հովհաննիսյանը հարթակից թարմացրեց ՀՀ Նախագահ Սերժ Սարգսյանի ուղղված անցած տարվա իր առաջարկը: Այն է՝ ստեղծել ժամանակավոր կառավարություն, որ հրաժարական տան ՀՀ վարչապետն ու ՀՀ Նախագահ, և մինչև ապրիլի 24–ը արտահերթ նախագահական ու խորհրդարանական ընտրություններ անցկացվեն:

Դիմելով Ազատության հրապարակում կանգնածներին՝ Րաֆֆի Հովհաննիսյանը հարցրեց. «Մենք այստեղ հավաքվել ենք, պատրա՞ստ եք կյանքի, պայքարի, մահվան և նորից պայքարի, պատրա՞ստ եք»: Րաֆֆի Հովհաննիսյանը հավելեց նաև, որ իր հայրը՝ պատմաբան Ռիչարդ Հովհաննիսյանը կյանքում, նրա խոսքով՝ Հայոց պատմության մեջ, ամենակարճ ելույթն է ունեցել՝ ասելով. «Խոսքից գործ»:

Եվրասիական տնտեսական միության ընդդիմախոս Րաֆֆի Հովհաննիսյանն իր ելույթում անդրադարձավ Լևոն Տեր-Պետրոսյանի ելույթին, որի ժամանակ նա կրկին ասել էր, որ ԵՏՄ-ին դեմ արտահայտվողները մի խումբ ջղաձգվողներ են: Նա հայտարարեց, որ իրենք՝ ներքին տարաձայնություններ ու հակասություններ ունեցող առաջնորդները, դրանք հաղթահարած՝ այստեղ են, որ ամեն մարդ ունենա ազատ արտահայտվելու իրավունք և որ ինքը՝ Րաֆֆի Հովհաննիսյանը պաշտպանում է Լևոն Տեր-Պետրոսյանի այդ իրավունքը:

Ըստ «Ժառանգության» առաջնորդի, ինքը հասկացել է, որ այս «փուչ աշխարհում» ամեն մեկը հետապնդում է իր շահը և բոլորը նույն են, թե Ռուսաստանը, թե Եվրոպան ու թե ԱՄՆ-ն՝ հիշեցնելով, որ Արևմուտքը ճանաչեց 2012թ. կեղծված ընտրությունները:

«Ժառանգության» առաջնորդը հավելեց, որ եթե, այնուամենայնիվ, Հայաստանը միանա որևէ միության՝ «սոյուզի»՝ եվրասիակա՞ն լինի, թե եվրոպական, համաձայն չէ, բայց եթե այլ հնարավորություն չլինի, ուրեմն պետք է մտնի Արցախի անկախությունն ու տարածքային ամբողջականությունը ճանաչած:

Նա ավելացրեց նաև, որ այսօր՝ հոկտեմբերի 24-ին պետք է լինի «վերջի սկիզբը կամ սկզբի վերջը»:

18.16

Հանրահավաքների բազմամարդությունը ցույց է տալիս, որ Հայաստանում մեկնարկել է իշխանափոխության հուժկու գործընթաց. Լևոն Տեր-Պետրոսյան

ՀՀ առաջին նախագահ ՀԱԿ ղեկավար Լևոն Տեր-Պետրոսյանը հայտարարեց, թե այսօրվա հանրահավաքի հիմնական ելույթի պատիվը վերապահված է լինելու Գագիկ Ծառուկյանին և այդ պատճառով ինքն ընդամենը կբավարարվի մի քանի դիտարկումներով։

Առաջին դիտարկումը վերաբերում է սկսած գործընթացին դեմ արտահայտվող մարգինալ ուժերին։ «Նոր համաժողովրդական շարժման առաջին երկու հանրահավաքների բազմամարդությունը ցույց է տալիս, որ Հայաստանում մեկնարկել է իշխանափոխության հուժկու գործընթաց, որը լուրջ հեռանկար ունի»,- ասաց նա և օրինակ բերեց 1991թ-ին անկախության համար պայքարած որոշ քաղաքական ուժերին, որոնք ըստ նրա՝ իբրև թե պայքարել են ՀՀ անկախության վերականգնման համար, սակայն 91թ-ին՝ անկախությունից հետո, մեկ ակնթարթում փոխեցին իրենց դավանանքը և դեմ արտահայտեցին անկախությանը, որովհետև այն ձեռք էր բերվում ոչ թե իրենց, այլ ուրիշների միջոցով»։

Երկրորդ դիտարկումը, վերաբերում էր ՀՀ-ի ԵՏՄ անդամակցությանը. «Հոկտեմբերի 10-ի հանրահավաքում ես չխոսեցի ԵՏՄ-ի անդամագրման ստորագրման փաստի մասին, քանի որ դա տեղի է ունեցել հանրահավաքից ընդամենը մի քանի ժամ առաջ, իսկ ես սովորություն չունեմ, ոտքի վրա հապշտապ գնահատական տալու»,-ասաց նա։

Լևոն Տեր-Պետրոսյանն անդրադարձավ նաև ուկրաինական ճգնաժամին. «Մեծաքանակ բնակչությամբ, հարուստ բնական պաշարներով Ուկրաինան մի օր ոտքի կկանգնի տեղի ունեցածից հետո ու իր տեղը կզբաղեցնի ուժեղ պետությունների կողքին: Մի՞թե դժվար է հասկանալ, որ նման իրավիճակում մեր երկիրը կվերանա աշխարհի քարտեզից … Նույնիսկ Արևմուտքն ըմբռնումով է մոտենում Հայաստանի որոշմանը, մինչդեռ մեզ մոտ մի խումբ մարդիկ հակառակն են ապացուցում ու հակառուսական շարժման դրդում, առանց հասկանալու, որ Հայաստանում նման հող չկա, եթե լիներ, նախորդ տարվա սեպտեմբերից թող մի բան անեին»,-ասաց նա:

Լևոն Տեր-Պետրոսյանը նաև նշեց, որ այլևս անիմաստ է ազգովի սուգ հայտարարել, ողբալ, լաց լինել ԵՏՄ-ին անդամակցելու համար: «Մենք պետք է թևներս քշտենք, օգտվենք այդ համակարգից ու փորձենք շենացնել ու բարեկարգել երկիրը… Չափազանցված է անդամագրվելու հետևանքով ՀՀ ինքնիշխանության կորստի վերաբերյալ խոսակցությունները։ Ինքնիշխանությունը ոչ այլ ինչ է, քան ինքնուրույն որոշումներ կայացնելու ունակություն: Ցանկացած կազմակերպության անդամագրվելիս պետությունները սեփական կամքով մասնակի կորցնում են ինքնուրույն որոշումներ կայացնելու հնարավորությունը … ՄԱԿ-ի ԵԱՀԿ-ի, ԵԽԽՎ-ի, ԵՄ-ին միացած պետությունները կորցրել են իրենց ինքնիշխանության մի մասը, որովհետև կա կանոնադրություն, որոնց պետք է այդ երկրները ենթարկվեն: Սա նշանակում է, որ եթե անգամ ԵՏՄ-ի փոխարեն Հայաստանը ստորագրեր Եվրաասոցացման համաձայնագիրը, զրկվելու էր դարձյալ ինքնիշխանության մի մասից, գուցե ավելի, քան ԵՏՄ-ի պարագայում»,-ասաց առաջին նախագահը:

Ինչ վերաբերում է պայքարին, ապա Լևոն Տեր-Պետրոսյանն ասաց. «Մենք ստրատեգիայի հարցում միակամ ու վճռական ենք ու գնալու ենք մինչև վերջ»։ Խոսելով տակտիկայի մասին՝ հետագա գործողություններին, ապա ՀԱԿ առաջնորդը նշեց, որ դա հանրային քննարկման առարկա չի կարող դառնալ, քանի որ երբ տակտիկան բացահայտվում է, այդ պահից դադարում է տակտիկա լինել:

Նշելով, որ հրապարակում հավաքված ժողովուրդը վստահում է յուրաքանչյուրն իր կազմակերպությանը՝ առաջին նախագահը հարցրեց հանրահավաքի մասնակիցներին՝ համաձայն են շարժման ղեկավարությանը տալ այդ իրավասության՝ չբացահայտել տակտիկան, բոլորը բացականչեցին՝ «այո»: «Սա էլ մեր պատասխանը Չեմբեռլենին»,-ասաց նա:

18.08

Այս համակարգը քանդել հնարավոր է մի ճանապարհով՝ իշխանափոխությամբ. Վարդան Օսկանյան

Եռյակի հանրահավաքին «Բարգավաճ Հայաստան» խմբակցության պատգամավոր Վարդան Օսկանյանը հայտարարեց, որ իրենք այս հարթակ ինքնանպատակ չեն եկել, այլ եկել են պարտադրված, ստիպողաբար, որովհետև այլընտրանք չկա, երկիրը ծանր վիճակում է և եթե այսպես շարունակվի, վտանգելու ենք երկրի ինքնիշխանությունը։

«Իշխանություններն անտեսում և արհամարհում են այսօրվա այդ ծանր վիճակը, ձևացնում են, որ ամեն ինչ նորմալ է, պատրաստ չեն որևէ բան փոխել իրենց քաղաքականության մեջ, ավելին՝ սահմանադրական ավանտյուրայի միջոցով փորձում են երկարաձգել իշխանությունը»,-ասաց նա՝ ավելացնելով, որ իշխանության հետ ամեն ինչ փորձվել է՝ վերջինը ընդդիմության 12 պահանջներն էին:

«Այս իշխանությունները ոչ միայն պատրաստ չեն որևէ բան անելու, այլ նաև ի վիճակի չեն, որովհետև այս տարիների ընթացքում նրանց վարած տնտեսական, ապաշնորհ քաղաքականության արդյունքում ձևավորվել է մի այնպիսի համակարգ, որի մեջ եթե ազնիվ մարդիկ փորձեն բան փոխել, չեն կարող: Այսօր այս համակարգը քանդել հնարավոր է մի ճանապարհով՝ իշխանափոխությամբ»,- հայտարարեց Վարդան Օսկանյանը։

18.02


Ոչ թե Սահմանադրությունն է պետք փոխել, այլ Սահմանադրությունը խախտող իշխանությունը. Ստեփան Դեմիրճյան

Ազատության հրապարակի հարթակից Հայաստանի ժողովրդական կուսակցության ղեկավար Ստեփան Դեմիրճյանը հայտարարեց, թե ոչ թե Սահմանադրությունն է պետք փոխել, այլ այդ Սահմանադրությունը խախտող իշխանությանը։

Նրա խոսքով՝ այսօրվա ծանր վիճակը, տարիներ շարունակ իրականացվող հակաժողովրդական քաղաքականության տրամաբանական շարունակությունն է:
 

«Երկիրը գտնվում է համակողմանի ճգնաժամի մեջ, և սա բացառապես ապաշնորհ կառավարման, այլ ոչ թե օբյեկտիվ իրականության արդյունք է,- հայտարարեց ՀԺԿ նախագահը,- Քրեաօլիգարխիկ համակարգը դատապարտում է մարդկանց անհուսության և արտագաղթի, մարդկանց մի խումբ բռնազավթել իշխանությունը, սեփականացրել է երկիրը և ուզում է հավերժ իշխել»:

Իր խոսքը նա ավարտեց՝ ասելով, որ խնդիրը երկրում ժողովրդի վստահությունը վայելող իշխանության ձևավորումն է։

 

17.47


Քանի որ այստեղ հավաքված է հավատով ժողովուրդ, ուրեմն իմ հավատը հայ ժողովուրդն է, իմ եկեղեցին ՝ Ազատության հրապարակը. Արամ Մանուկյան

«Հայ ազգային կոնգրես» կուսակցության փոխնախագահ Արամ Մանուկյանը նշեց, որ այսօր Ազատության հրապարակում հավաքվել է արժանապատիվ ու ազատատենչ ժողովուրդ, որը հայտ է ներկայացնում աշխարհի բոլոր երկրներին, որ ինքը գալիս է իշխանության իր իսկ կամքով և իրականացնում է Սահմանադրության այն կարևոր կետը՝ համաձայն որի, իշխանությունը պատկանում է ժողովրդին:

«Այսօր խոսելու ենք գործնական ու կոնկրետ: Կոչով դիմում եմ նրանց, ովքեր նաև այստեղ չեն, նախորդ հանրահավաքին մեզ մոտ 100 հազ. մարդ նայել է ինտերնետային տարբեր կայքերով: Այսօր արդեն կանգնած են այստեղ, մարդկանց թիվը հրապարակում կտրուկ մեծ է, այս պահին 200 հազ. մարդ հետևում է այս հանրահավաքին: Դիմում եմ միջազգային կազմակերպություններին և դեսպանություններին՝ ձեզնից ակնկալում ենք ընդամենը ճշգրիտ տվյալների գրանցում, ուրիշ ակնկալիք չունենք»,-ասաց նա:

Արամ Մանուկյանը այնուհետև դիմեց երկրի մտավորականությանը, ուսանողությանը, գիտականներին և նշեց, որ իրենք այս երկրում ոչինչ անել չեն կարողանում, դրա համար պետք է մեջքը ուղղել ու գալ Ազատության հրապարակ:

«Ուսանողությունը ամորձատված է, մշակույթի գործիչները ակնկալիքներ ունեն իշխանությունից: Այստեղ է հայ ժողովրդի լավագույն մասը, ըմբոստ մասը, եկե՛ք, միացեք: Քանի որ այստեղ հավաքված է հավատով ժողովուրդ, ուրեմն իմ հավատը հայ ժողովուրդն է, իմ եկեղեցին ՝ Ազատության հրապարակը»,-ասաց նա:

 17.27


Հանրահավաքը վարող ԲՀԿ–ական պատգամավոր Տիգրան Ուրիխանյանն իր խոսքը սկսեց` շնորհակալություն հայտնելով Ազատության հրապարակում հավաքվածներին։

«Շնորհակալ ենք, որ եկել եք տեր կանգնելու ներկա փոփոխություններին, տեր կանգնելու մեր երկրին, շնորհակալ ենք, որ ձեր ձայնը հաղորդեցիք համաժողովրդական ալիքին»,-ասաց նա և հավելեց, թե ոչ իշխանական քաղաքական ուժերը ձեռնարկել են այս գործընթացը «բոլորի համար սիրելի, կյանքում ամենակարևոր երկրի՝ Հայաստանի Հանրապետության զարգացման, առաջընթացի ու փրկության գործի համար»։

«Ուզում եմ վստահ լինեք, չնայած քարոզներին, հակաքարոզներին, մեր ու ձեր տրամադրվածությունը շեղելու փորձերին, որևէ բան չի լինելու այլ, քան դուք ցանկանալու եք»,-ասաց նա։

 

Ազատության հրապարակում մեկնարել է Ազգային ժողովի ոչ իշխանական ուժերի եռյակի՝ «Հայ ազգային կոնգրես»–ի, «Բարգավաճ Հայաստան»–ի և «Ժառանգության» երկրորդ համապետական հանրահավաքը։


Ինչպես նախորդ հանրահավաքին, այսօր ևս հարթակում  են այդ ուժերի առաջնորդներ Լևոն Տեր-Պետրոսյանը, Գագիկ Ծառուկյանը և Րաֆֆի Հովհաննիսյանը:

Նախորդ հանրահավաքին առաջնորդներից իրենց հիմնական ասելիքով ելույթ էին ունեցել Րաֆֆի հովհաննիսյանը և Լևոն Տեր-Պետրոսյանը, իսկ Գագիկ Ծառուկյանն իր ելույթում ասել էր, թե իր գլխավոր ասելիքը կասի այսօր:

Հանրահավաքի օրակարգում ոչ իշխանական ուժերի մշակած 12 կետերն են, գումարած էլեկտրաէներգիայի հարցը:

Հիշեցնենք նաև, որ մինչ համապետական հանրահավաքներ սկսելը եռյակի անդամները հանրահավաքներ են անցկացրել նաև ՀՀ տարբեր մարզերում: