Հղիության նպաստի կրճատման հարցում որևէ փոխզիջում հնարավոր չէ. Կանանց ռեսուրսային կենտրոնի իրավաբան

22:48 • 27.10.14

Կանանց ռեսուրսային կենտրոնի իրավաբան Նվարդ Փիլիպոսյանը գտնում է, որ Կառավարության նոր որոշմամբ կանանց հղիության նպաստների կրճատման պատճառով բողոքի դուրս եկած կանայք որևէ փոխզիջում հնարավոր չեն համարում և պատրաստ են պայքարել մինչև օրենքի նոր փոփոխության վերջնական կասեցումը:


«Որքան ես եմ նկատել, բողոքողները չեն առաջարկում
փոխզիջումային տարբերակներ: Մարդիկ դեմ են այդ փոփոխությանը և գտնում են, որ պետք է օրենքը մնա այնպես, ինչպես եղել է: Մենք գտնում ենք, որ որևէ փոխզիջում հնարավոր չէ»,-Tert.am-ի հետ զրույցում ասաց նա և ավելացրեց, որ եթե Կառավարությունը ցանկանում է նաև չաշխատող կանանց տրամադրել նպաստ, ապա կարող են այլ տարբերակ մտածել:


Իրավաբանը չհամաձայնեց հնչող տեսակետներին, թե այդ գումարով չէ, որ մարդիկ երեխա կունենան: «Գումարի կորուստը շատ ավելի մեծ է, քան ներկայացվում է: Ես չեմ կարծում, որ դեմոգրաֆիկ խնդիրներ չի կարող առաջացնել այդ փոփոխությունը: Զարգացող երկրներում խնդիրն այլ է, կինը աշխատի, թե չաշխատի, ստանում է այդ գումարը: Եթե նա աշխատում է, ստանում է աշխատավարձ, եթե չի աշխատում, նույնիսկ դրանից ավելի շատ նպաստներ կարող է ստանալ: Նրանց ֆինանսական վիճակը բոլորովին կախված չէ աշխատել-չաշխատելուց»,-ասաց Նվարդ Փիլիպոսյանը:


Վերջինս նաև նշեց, որ Հայաստանում երեխաներ ունենալու բոլոր խնդիրները կապվում են առաջին հերթին` ֆինանսի հետ. «Իսկ մեր Կառավարության հիմնավորումները շատ զարգացած և հարուստ երկրներին են վերաբերում, մեր երկրի դեպքում դրանք կիրառելի չեն»: