2015 թ-ի պետբյուջեն նախատեսում է ՀՆԱ-ի 4.1% աճ. Պավել Սաֆարյան

12:04 • 28.10.14

Ազգային ժողովում 2015թ-ի պետական բյուջեի նախագծի ներկայացման ժամանակ Ֆինանսների փոխնախարար Պավել Սաֆարյանն այսօր ասաց, որ 2015 թ-ի պետական բյուջեի նախագծով նախատեսված է ՀՆԱ-ի աճ 4.1%, ՀՆԱ դեֆլյատորի մեծությունը՝ 3.3%:


Ըստ նրա՝ պետական պարտքի ընդհանուր մակարդակը 2015-ի ավարտին կանխատեսվել է 4 միլիարդ 953 միլիոն դոլար, որի 83%-ը բաժին է ընկնելու արտաքին պարտքին, մնացած 15 տոկոսը ներքին պարտքն է: Եկամուտները 2015 թվականի նախագծվել է մեկ միլիարդ 184 միլիոն դրամի չափով: Այդ եկամուտների 95%-ը կազմելու են հարկային եկամուտներն ու տուրքերը, մոտ երկու տոկոսը դրամաշնորհներն են:


«Դրամաշնորհներ շարունակելու ենք ստանալ. եվրոպական հարևանության շրջանակներում 20 միլիոն եվրոյի չափով դրամաշնորհ ենք ստանալու»,- նկատեց փոխնախարարը:


Նա տեղեկացրեց, որ բյուջեի նախագծով ծախսերի ծավալը ծրագրվել է մեկ տրիլիոն 298 միլիարդ դրամ, որից 92 տոկոսը բաժին 1 ընկնում ընթացիկ ծախսերին:


Ամենակարևոր խնդիրներից մեկը, նրա խոսքով այն է, որ բյուջեի կատարման ընթացքում պարտքեր չվերցվեն:
Բյուջեի գերակայությունները երեքն են՝ սոցիալական ոլորտի առանձին ճյուղերի զարգացումը՝ սոցիալական պաշտպանություն, կրթություն, մշակույթ ու առողջապահություն, երկրորդը՝ պաշտպանության, ազգային անվտանգության ապահովում, երրորդը՝ ճանապարհային, ջրային տնտեսության, էներգետիկայի բնագավառում ծրագրերի իրականացումը:


Կրթության ոլորտի ծախսեը կազմելու են 127 միլիարդ դրամ, հիմնական ծախսերի շուրջ 75 միլիարդն ուղղվելու է հանրակրթության ոլորտին: Սա նախորդ տարվա համեմատությամբ չորս միլիարդով ավել է, ու դա պայմանավորված է 2014 թ-ի հուլիսի 1-ից ուսուցիչների աշխատավարձի բարձրացմամբ, ինչպես նաև սովորողների թվի ավելացմամբ:


Ի դեպ, Պավել Սաֆարյանն ընդգծեց, որ առաջին անգամ է, երբ ծախսերը պլանավորել են այն հաշվարկով, որ աշակերտների թիվն ավելացել է, նախորդ տարիներին աշակերտների թիվը մշտապես պակասում էր: