Նոր Զելանդիայում դրոշը փոխելու հարցով հանրաքվե կանցկացնեն

11:25 • 29.10.14

Նոր Զելանդիայում երկու տարուց կկայանա ազգային դրոշը փոխելու հարցով հանրաքվե, հայտարարել է երկրի վարչապետ Ջոն Քեյը, հաղորդում է BBC-ի ռուսական ծառայությունը:

 

Գործընթացը կանցկացվի երկու փուլով: Հաջորդ տարվա վերջին քաղաքացիները մի քանի տարբերակներից կընտրեն դրոշի նոր դիզայնը, որոնք իր հերթին կընտրի հայտնի նորզելանդացիներից բաղկացած հանձնաժողովը:

 

Երկրորդ փուլում, որը նախատեսված է 2016 թվականին, երկրի բնակիչները կընտրեն, թե արդյոք մեկ տարի առաջ ընտրված դրոշը դարձնել պաշտոնական, թե պահպանել հինը:

 

Հանրաքվեի նախապատրաստության համար պատասխանատու հանձնաժողով կմտնի երկրի բոլոր քաղաքական կուսակցություններից մեկական ներկայացուցիչ:

 

Քեյի խոսքով՝ նոր դրոշն ավելի լավ պատկերացում կտա Նոր Զելանդիայի մասին: Ներկայիս դրոշի քննադատներն ասում են, որ այն հեշտ է շփոթել այլ նախկին բրիտանական գաղութների պետական խորհրդանիշների հետ՝ մասնավորապես Ավստրալիայի, որի դրոշը շատ նման է նորզելանդականին: