105-ամյա բրիտանացի «Շինդլերն» արժանացել է Չեխիայի բարձրագույն պարգևի (լուսանկարներ, տեսանյութ)
«Բրիտանացիների Շինդլեր» անունը ստացած նախկին բրոքեր Նիկոլաս Ուինթոնը 105 տարեկանում արժանացել է Չեխիայի Հանրապետության բարձրագույն պարգևի՝ նացիստների կողմից շրջափակված Պրահայից հարյուրավոր հրեա երեխաների փրկելու համար, գրում է The Daily Mail-ը։
Ուինթոնը համակենտրոնացման ճամբարներից փրկել է ավելի քան 650 երեխայի՝ գնացքներով տեղափոխելով նրանց Մեծ Բրիտանիա և խնամակալ ընտանիքներ փնտրելով նրանց համար։
Նա «Սպիտակ առյուծ» պարգևը ստացել է Չեխիայի նախագահ Միլոշ Զեմանից, ով նկարագրել է Ուինթոնին որպես «մարդասիրության, ինքնանվիրման, քաջության և համեստության օրինակ»։
Ելույթ ունենալով իր օգնությամբ փրկված մարդկանցից մի քանիսի առաջ՝ Ուինթոնն ասել է. «Շնորհակալություն բոլորին։ Ես հիացած եմ, որ երեխաներից շատերը դեռ այստեղ են»։ Նա նաև գովեստի խոսքեր է ասել այն ընտանիքներին, որոնք երեխաներին ընդունել են իրենց տանը Բրիտանիա տեղափոխվելուց հետո։
Ուինթոնին ուղեկցել են որդին, թոռները, դուստրը և նրա ամուսինը։
1938թ. դեկտեմբերին լոնդոնցի բորսայի բրոքեր Ուինթոնը գործերով մեկնում է Պրահա և այցելում փախստականների ճամբար։ Նրա ջանքերով երեխաները տեղափոխվում են Մեծ Բրիտանիա, որտեղ թերթերում Ուինթոնը հայտարարություններ է տալիս՝ երեխաների համար ընտանիքներ փնտրելու համար։













