Ուլտիմատումներով խոսելը քաղաքական պահանջ չէ. Էդուարդ Շարմազանովը՝ եռյակի պահանջների մասին
Հայաստանի հանրապետական կուսակցության Գործադիր մարմնի նիստից հետո Ազգային ժողովի փոխնախագահ, ՀՀԿ խոսնակ Էդուարդ Շարմազանովը տեղեկացրեց, որ նիստում քննարկվել են արտաքին քաղաքական հարցեր, անդրադարձ է կատարվել նաև 2015թ.-ի բյուջեին, իսկ փոխվարչապետի թափուր պաշտոնի համար թեկնածության հարց չի քննարկվել:
Անդրադառնալով Ազգային ժողովի ոչ իշխանական երեք ուժի պահանջներին՝ ՀՀԿ խոսնակն ասաց. «Եռյակի պահանջների մասին մի բան կարող եմ ասել, որ ուլտիմատումներով խոսելը քաղաքական պահանջ չէ: Արտահերթ ընտրությունները պատվերով համերգ չեն, որ ով երբ ցանկանա՝ պահանջի արտահերթ ընտրություններ: Եթե մարդիկ ուզում են փոփոխություններ, ապա մենք գնում ենք համակարգային փոփոխությունների ճանապարհով, իսկ դրա լավագույն ճանապարհը սահմանադրական բարեփոխումներն են»:
Էդուարդ Շարմազանովն անդրադարձավ նաև ՀՀ ԱԺ և ՌԴ ԱԺ միջխորհրդարանական հանձնաժողովի համանախագահ Նիկոլայ Ռիժկովի՝ Արցախի ուՂրիմի միջև համեմատություններ անելուն. «Ղարաբաղի խնդիրը պետք չէ որևէ խնդրի հետ համեմատել: Իսկ ինչ վերաբերում է համեմատության եզրին, թե Ղրիմը պատմական տարածք է, ասեմ, որ Արաքսի և Քուռի միացման վայրը Հայաստանն է, դա պատմական աղբյուրներում են վկայակոչվում: Ցանկացած մարդ, ով քիչ թե շատ տեղյակ է Հայաստանի պատմությանը, գիտի, որ Արցախը Հայաստանի պատմական հողն է: Դա ես չէ, որ պետք է ասեմ, դա ինձնից երկու հազար տարի առաջ ասել են հունահռոմեական պատմիչները»:










