Դախաուի նախկին համակենտրոնացման ճամբարից գողացել են նացիստական «Arbeit macht frei» ցուցանակը (լուսանկարներ)

14:52 • 03.11.14

Տխրահռչակ «Arbeit macht frei» գրությամբ ցուցանակը, որը գերմաներենից թարգմանաբար նշանակում է «Աշխատանքն ազատություն կպարգևի», կիրակի առավոտյան գողացել են Դախաուի նախկին համակենտրոնացման ճամբարից, հայտնել են Գերմանիայի ոստիկանությունից։

 

Ցուցանակն իրենից ներկայացնում է երկաթե շրջանակ, որի մեջ երկաթե ձուլված տառերով գրված է տեքստը, այս մասին գրում է rt.com-ը։

 

Երկաթե 190x94սմ չափսի ցուցանակը տեղակայված էր ճամբարի մուտքի դարպասին։

 

Դախաու ճամբարը 1960-ից սկսած վերածվել է անմեղ զոհերի հիշատակման թանգարանի, որտեղ մարդիկ կարող են այցելել և ծանոթանալ Երկրորդ համաշխարհային պատերազմի ժամանակ կատարվածին։

 

Թանգարանի տնօրեն Գաբրիել Համերմանն ասել է, որ իրենք տեսախցիկներ չեն տեղադրել վերահսկման նպատակով, քանի որ տեղի պաշտոնյաները դեմ են քվեարկել դրանց տեղադրմանը՝ ի նշան զոհերի հարգանքի։

 

Այն ի սկզբանե կառուցվել է քաղբանտարկյալների համար, Դախաուի մերձակայքում՝ Մյունխենից 17 կմ հեռու։ 

 

Ճամբարում ավելի քան 40 հազար մարդկանց դաժանաբար տանջամահ են արել և սպանել։
Դախաուն առաջին համակենտրոնացման ճամբարն է՝ կառուցված ֆաշիստական Գերմանիայում, որին հաջորդել են այլ ճամբարներ։