Առողջ տեսք ունենալը` աշխատավայրում հաջողության հասնելու գրավական

Շատերը կարծում են, որ խելացի երևալով՝ հնարավոր է առաջխաղացում ունենալ աշխատանքում, սակայն նրանք, ովքեր ցանկանում են նվաճումներ ունենալ աշխատավայրում և բարձր դիրք զբաղեցնել, պետք է կենտրոնանան առողջ տեսք ունենալու վրա:

Ինչպես ներկայացնում է Daily Mail-ը` այս մասին փաստում են վերջերս կատարված հետազոտությունն իրականացնող գիտաշխատողները: Վերջիններս պարզել են, որ առողջ տեսք ու մաշկ ունեցող աշխատակիցները 70 տոկոսով առավել գրավիչ են համարվում աշխատավայրում, քան նրանք, ովքեր խելացի տեսք ունի:

Գիտնականները նշում են, որ խելացի տեսքը «հավելյալ գործառույթ» է աշխատավարձի բարձրացման ձգտող աշխատակիցների կամ ընտրությունների պատրաստվող քաղաքական գործիչների համար, սակայն ուսումնասիրության ընթացքում հակառակն է պարզվել:

Փորձի ժամանակ 148 մասնակցի խնդրել են ընտրություն անել նույն մարդու երկու տարբեր լուսանկարների միջև, որոնցից մեկում նրա դեմքին առողջ, իսկ մյուսում՝ առավել խելացի տեսք էր հաղորդվել: Յուրաքանչյուր 10-ից 7-ը ընտրել է առողջ տեսք ունեցողին: