Իր տեսակի մեջ առաջին մկնիկը, որն արձանագրում է կենսաբանական փոփոխությունները (լուսանկարներ, տեսանյութ)

MionixLabs ընկերության մասնագետների թիմը ներկայացրել է իր տեսակի մեջ առաջին մկնիկը, որը գրանցում է այն օգտագործողի կենսաբանական տվյալների փոփոխությունները հատուկ ցուցիչների և սենսորների միջոցով, գրում է 3dnews.ru-ն։

Նոր սարքը կոչվում է  NAOS QG, որը կարող է հետևել օգտատիրոջ մաշկա-գալվանական ռեակցիային, որը հիմնականում արտահայտվում է մաշկի ֆիզիկական փոփոխություններով և քրտնարտադրությամբ։

Այդ մեթոդը հիմնականում օգտագործվում է հոգեթերապևտների կողմից անձի հոգեկան, հուզական և ֆիզիկական վիճակը դիտարկելու համար։

Այն նաև կարողանում է ստուգել անձի սրտի զարկերի արագությունը։ Նման մկնիկը, ըստ մշակողների, շատ օգտակար կլինի համակարգչային խաղերի սիրահարների ֆիզիկական և էմոցիոնալ արձագանքներին հետևելու համար։

Մշակողները մկնիկը ներկայացրել են Kickstarter դրամահավաքության կայքում, որտեղ նշում են, որ նախագիծն իրականացնելու համար անհրաժեշտ է 100.000 դոլար, որից առայժմ հավաքվել է մոտ 35.000-ը։

Եթե նախագիծը հաջողությամբ ֆինանսավորվի, ապա սարքը շուկա կհանվի 2015-ի հուլիսին և կարժենա 99 դոլար։