Լոնդոնի ամենաթանկարժեք թաղամասում սև թավշով պատված Rolls Royce են նկատել (լուսանկարներ, տեսանյութ)

Լոնդոնի կենտրոնական ամենաթանկարժեք Նայթսբրիջ շրջանի Harrods շքեղ առևտրի կենտրոնի բակում թավշեպատ Rolls Royce-ն են նկատել, որն արժանացել է անցորդների ուշադրությանը:

Ինչպես հայտնում է Daily Mail-ը` 300,000 ֆունտ ստերլինգ արժողությամբ  մեքենան ամբողջությամբ պատված է եղել սև թավիշով: Թավշեպատումը, որն իրականացվում է տարբեր գույների թավիշով, նոր առաջարկ է սուպերքարերի հատուկ պատվերների ցանկում, որը կարծես տարածում է գտնում շքեղ մեքենաների տերերի շրջանում:

 Բրիտանական ավտոտնակներից մեկի գնահատմամբ,  որտեղ ևս նման պատվերներ են իրականացվում, այդ աշխատանքը Rolls Royce-ի սեփականատիրոջ համար 3000 ֆունտ ստերլինգ արժեցած կլինի:

Թավշեպատման ծառայությունը ստեղծել է Velvet Car ֆրանսիական ընկերությունը, որը մասնագիտանում է շքեղ աքսեսուարների և ժապավենների պատրաստման գործում: Ծառայությունն իրենից ներկայացնում է  մեքենայի «փաթեթավորումը» եղանակային պայմանների նկատմամբ դիմացկուն մանրաթելով: