Թուրքական իշխանությունները սպառնում են արգելափակել Twitter-ը

Թուրքիայի կառավարությունը սպառնում է արգելափակել Twitter-ը, քանի որ սոցցանցը հրաժարվել է փակել ընդդիմադիր թերթի միկրոբլոգը, տեղեկացնում է korrespondent.net-ը:

Հաղորդվում է, որ Ադանա քաղաքի դատարանը լրատվական գործակալություններին ու թերթերին արգելել է լուսաբանել ու մեկնաբանել Սիրիայի տարածք հումանիտար օգնություն ուղարկելու լուրը:

Տեղական լրատվամիջոցները պնդում են, որ զենքերով լեցուն բեռնատարներ են ուղարկվել Սիրիա՝ կառավարական ուժերի դեմ պայքարի համար: Թուրքական իշխանությունները հերքում են այդ տեղեկությունը՝ նշելով, որ բեռնատարները Սիրիայի խաղաղ բնակիչների համար են հումանիտար օգնություն տարել:

Թուրքական իշխանությունների կարծիքով՝ տեղական լրատվամիջոցների նման պահվածքը սպառնում է ազգային անվտանգությանը, քանի որ թեմայի լուսաբանումն արգելված է եղել: Ընդդիմադիր Halki Gazetesi-ն, սակայն, շարունակել է այդ մասին գրել Twitter-ի իր միկրոբլոգում:

Կառավարությունը պահանջել է փակել թերթի էջը, սակայն սոցցանցը հրաժարվել է դա անել: