Բրիտանացին, ով ուժեղ «դեժավյուով» է տառապում, դադարել է հեռուստացույց դիտել և կարդալ

23-ամյա բրիտանացին դարձել է  բժշկության պատմության մեջ գրանցված «դեժավյուի» (déjà vu) ամենատարօրինակ դրսևորումներից մեկի զոհը:

Ինչպես գրում է Daily Mail-ը` բրիտանացին պատմել է գիտնականներին, որ դադարել է հեռուստացույց դիտել, ռադիո լսել կամ թերթ ու ամսագիր կարդալ, քանի որ իրեն միշտ թվում է, որ նախկինում տեսել է այդ ամենը:
Երիտասարդը, հայտնվելով «ժամանակի ցանցում», ստիպված է եղել թողնել համալսարանը, որից հետո մեկնել է հանգստանալու իր սիրած առողջարաններից մեկը, սակայն հիվանդության «հարձակումները» չեն դադարել:

Տարօրինակ զգացմունքներն ավելի ուժեղ են, քան դեժավյուի սովորական զգացողությունը, որը ֆրանսերենից թարգմանաբար նշանակում է «արդեն տեսել եմ»:

Տարօրինակն այն է, որ բրիտանացին չի տառապում այն նյարդաբանական խանգարումներով, որոնք սովորաբար ի հայտ են գալիս դեժավյու ապրող մարդկանց մոտ: