Ծիր Կաթինում կարող է գոյություն ունենալ դեպի այլ տիեզերք տանող հսկայական «դուռ» (լուսանկարներ, տեսանյութ)

Իտալացի գիտնականների անցկացրած ուսումնասիրությունների արդյունքում պարզվել է, որ Ծիր Կաթին գալակտիկայի կենտրոնում կարող է գոյություն ունենալ հսկայական որդնանցք, որը        տանում է դեպի այլ տարածաժամային հարթություն, այլ տիեզերք:

Ինչպես նշում է dailymail.co.uk-ը, որդնանցքը (wormhole), որը հայտնի է նաև որպես Էյնշտեյն-Ռոզենի կամրջակ, տարածաժամանակի ենթադրական տոպոլոգիական հատկություն է: Այն տարածության և ժամանակի մեջ ամենակարճ ուղին է: Որդնանցքը նման է թունելի, որի երկու ծայրերը տարածաժամանակի տարբեր կետեր են:

Աղբյուրը մանրամասնում է, որ որդնանցքի գոյության ու դրա միջով ճամփորդելու գաղափարներն ընդունելի են Էյնշտեյնի հանրահայտ «Հարաբերականության տեսության» մեջ: Սակայն գիտնականների մեծ մասը հերքում է դրանք, քանի որ որդնանցքի գոյության ապացույց չկա:

Այժմ իտալացի գիտնականները հանգել են այն եզրակացության, որ գալակտիկայի կենտրոնում գտնվող «սև խոռոչն» իրականում քողարկված որդնանցք է: