Google-ը շնորհավորել է սիրահարներին Սբ Վալենտինի օրվա առթիվ (շարժանկարներ)

Այսօր ամբողջ աշխարհում նշում են Սուրբ Վալենտինի օրը, որը համարվում է սիրո տոն, ինչի կապակցությամբ սիրահար զույգերին շնորհավորել է նաև Google ընկերությունը՝ իր լոգոյի անիմացիայով, գրում է korrespondent.net-ը:

Google-ը տոնի առթիվ իր գլխավոր էջում, ինչպես նաև դիտարկիչի որոնման հատվածում ներկայացրել է անիմացիոն շարժանկար, որտեղ իր լոգոյի անվանման կարմիր գույնի o տառը երաժշտություն է լսում, ապա ականջակալը տալիս է մյուս o-ին և նրանց գլխավերևում սրտիկներ են հայտնվում: 

Նմանատիպ կերպով երկու o տառերը նաև միասին համակարգչից են օգտվում, անձրևի տակ քայլում, միմյանց գտնում և այլն:

Նշվում է, որ տոնն անվանվել է հոգևորական և սուրբ ճանաչված Վալենտին Հռոմեացու պատվին:

Սիրահարները միմյանց շոկոլադներ, բացիկներ, փուչիկներ, ծաղիկներ և այլ նվերներ են մատուցում ու միասին տոնում օրը:

Ճապոնիայում այս օրը կանայք շոկոլադներ և քաղցրավենիք են նվիրում ոչ միայն իրենց սիրեցյալներին այլ նաև բարեկամնեին և ընտանիքի այլ անդամներին:

Թաիլանդում այսօր 30 զույգ գրկախառնության մարաթոն է սկսել, և այն զույգը, որը կկարողանա ավելի երկար գրկախառնված մնալ, կգրանցի նոր ռեկորդ՝ նախկին 25 ժամ, 22 րոպե և 36 վայրկյանի փոխարեն: