ՀՀ-ում Սլովակիայի նորանշանակ դեսպանն իր հավատարմագրերի պատճենն է հանձնել ԱԳ նախարարի տեղակալին

17:36 • 05.03.15

Մարտի 5-ին ՀՀ-ում Սլովակիայի նորանշանակ դեսպան Պետեր Պրիպուտենը (նստավայրը` Մոսկվա) իր հավատարմագրերի պատճենն է  հանձնել արտաքին գործերի նախարարի տեղակալ Կարեն Նազարյանին: Այս մասին տեղեկացնում է ՀՀ ԱԳ նախարարության լրատվական ծառայությունը։


Շնորհավորելով դեսպանին նշանակման կապակցությամբ՝ նախարարի տեղակալը նշել է, որ բարեկամության և նույնական արժեքների վրա խարսխված հայ-սլովակական հարաբերություններն ամուր հիմք են հանդիսանում փոխշահավետ համագործակցության զարգացման համար:


Նախարարի տեղակալը հաջողություն է մաղթել դեսպանին իր առաքելության մեջ՝ հույս հայտնելով, որ դեսպանը նոր լիցք կհաղորդի ինչպես երկկողմ, այնպես էլ բազմակողմ ձևաչափերում հարաբերությունների ընդլայնմանն ու համագործակցության խորացմանը:


Շնորհակալություն հայտնելով ընդունելության և բարեմաղթանքների համար՝ դեսպան Պրիպուտենն ասել է, որ Սլովակիայում նույնպես մեծ կարևորություն են տալիս երկու երկրների միջև հարաբերությունների զարգացմանը: Նա վստահեցրել է, որ կներդնի առավելագույն ջանքեր` Հայաստանի և Սլովակիայի միջև համակողմանի փոխգործակցության զարգացումն առաջ մղելու համար:


Զրուցակիցները քննարկել են հայ-սլովակական հարաբերությունների օրակարգային հարցեր` քաղաքական, տնտեսական և այլ ոլորտներում իրականացվող համագործակցությունը և նախատեսվող համատեղ ծրագրերը: