ԱՄՆ ռազմական դատարանը Wikileaks-ի իրազեկիչ Մենինգին կին է ճանաչել
Վաշինգտոնում ռազմական վերաքննիչ դատարանը հետախուզության նախկին շարքային Բրեդլի Մենինգին կին է ճանաչել, գրում է lenta.ru-ն:
Մեկ տարի առաջ դատարանը նրան թույլ էր տվել վերցնել Չելսի Էլիզաբեթ կանացի անունը, իսկ մեկ ամիս առաջ թույլ է տվել սեռափոխության հորմոնալ թերապիայի կուրս անցնել:
Այս անգամ դատավորը որոշել է, որ Մենինգի մասին ցանկացած նամակագրության մեջ անհրաժեշտ է նրա մասին խոսել՝ օգտագործելով սեռական ինքնության տեսակետից չեզոք լեզու (օրինակ՝ ԱՄՆ բանակի շարքային Մենինգ), կամ իգական դերանուններ:
Մենինգը ձերբակալվել է 2010 թվականի մայիսին Իրաքում ծառայության ժամանակ: Նա խոստովանել է, որ համագործակցել է Wikileaks սկանդալային կայքի հետ և մոտ 700 հազար գաղտնի փաստաթուղթ փոխանցել, որոնք վերաբերում են Իրաքում և Աֆղանստանում ԱՄՆ ռազմական գործողություններին:
Մենինգի կողմից կազմակերպությանը փոխանցված տեղեկություններն ԱՄՆ պատմության մեջ գաղտնի տեղեկատվության ամենախոշոր արտահոսք են ճանաչվել:
2013 թվականի օգոստոսին շարքայինը դատապարտվել է 35 տարվա ազատազրկման և իր պատիժը կրում է Ֆորտ-Լիվենվորտ ռազմական բանտում:










