Նեմցովի սպանության գործով երկու կասկածյալներին մեղադրանք է առաջադրվել

17:21 • 08.03.15

Հետաքննությունը պաշտոնապես մեղադրանքներ է առաջադրել Ռուսաստանի քաղաքական գործիչ Բորիս Նեմցովի սպանության գործով ներգրավված հինգ կասկածյալներից երկուսին: Այդ մասին ria.ru-ին հայտնել է դատարանի մամուլի քարտուղար Աննա Ֆադեևան:

«Երեքը դեռ մնում են կասկածյալի կարգավիճակում»,- ասել է նա:

Ֆադեևան հստակեցրել է, որ մեղադրանք է առաջադրվել Զաուր Դադաևին և Անզոր Գուբաշևին: Մեղադրանքի հոդվածները դեռ չեն նշվում:

Նախկինում ՌԴ կառավարությունում բարձր պաշտոններ զբաղեցրած, իսկ այնուհետև ընդդիմության առաջնորդներից մեկը դարձած Նեմցովը սպանվել էր Մոսկվայի կենտրոնում փետրվարի 27-ի երեկոյան:

Հետաքննությունը դիտարկում է հանցագործության մի քանի վարկած՝ ներառյալ պատվիրված սպանություն:

Այդ գործով Զաուր Դադաևին և Անզոր Գուբաշևին բերման ենթարկելու մասին Ռուսաստանի անվտանգության դաշնային ծառայությունը հայտնել է շաբաթ օրը:  

Ավելի վաղ հաղորդվել է, որ Գրոզնիում մահացել է Նեմցովի սպանության գործով կասկածյալներից մեկը, ով փորձելով դիմադրություն ցույց տալ ոստիկաններին՝ պայթել է իր նետած նռնակից: