Կյանքից հեռացել է Հայաստանի ներքին գործերի նախկին նախարար Վլադիմիր Դարբինյանը

13:13 • 19.03.15

Կյանքից հեռացել է Հայաստանի ներքին գործերի նախկին նախարար Վլադիմիր Դարբինյանը:


Այս մասին տեղեկացնում է police.am կայքը։


Ծնվել է 1931 թվականին, Իջևանի շրջանի Աչաջուր գյուղում:
Երևանի պետական համալսարանի պատմության, այնուհետև՝ իրավաբանական ֆակուլտետներն ավարտելուց հետո անցել է կուսակցական աշխատանքի:
1969 թվականից մինչև 1975 թվականը Վլադիմիր Դարբինյանը Հայաստանի ներքին գործերի նախարարն էր:


ՀՀ ոստիկանության կայքում նշվում է, որ Ներքին գործերի նախարարության և նրա ստորաբաժանումների գործունեության արդյունավետությունը բարձրացնելու նպատակով՝ նրա պաշտոնավարության տարիներին մի շարք կարևորագույն խնդիրներ են լուծվել, մասնավորապես՝ կադրային, նյութատեխնիկական բազայի և համակարգի աշխատողների սոցիալ-կենցաղային պայմանների բարելավման բնագավառներում:


Զգալի աշխատանք է կատարվել ներքին գործերի շրջանային բաժինները և նախարարության վարչությունները տեխնիկական միջոցներով հագեցնելու ուղղությամբ:

 

Հետագայում Վլադիմիր Դարբինյանը մի շարք պատասխանատու պաշտոններ է վարել՝ արդարադատության նախարարի տեղակալ, հանրապետության իրավաբանների միության նախագահ, Սարդարապատի հուշահամալիրի գլխավոր տնօրեն: