Նաիրիտցիները կրկին բողոքում են և պահանջում աշխատավարձերի մարման հստակ ժամանակացույց

13:03 • 19.03.15

«Նաիրիտ» ՓԲԸ-ի արդեն նախկին աշխատակիցներն այսօր հերթական անգամ հավաքվել էին Կառավարության շենքի առաջ և պահանջում էին իրենց աշխատավարձերը։


Նրանք նշում էին, որ այլևս չեն հավատում Կառավարությանը, և պահանջում էին իրենց աշխատավարձերի մարման հստակ ժամանակացույց ներկայացնել։ «Այլևս չի կարելի մեզ խոստումներ տալ և այդ խոստումները չկատարել, որն էլ հանգեցնում է այս վիճակին»,- բողոքեց գործարանի նաիրիտի նախկին աշխատակիցներից  մեկը։


Նա նշեց, որ իրենք հստակ հասկանում են, որ այս հարցի կարգավորման համար անհրաժեշտ է քաղաքական կամք, որպեսզի ի վերջո լուծում տրվի արդեն 4 տարի շարունակվող իրավիճակին։


«Անընդհատ ասել, որ պետք է սպասել միջպետական բանկի հետ պետք է հարցը կարգավորվի՝ նշանակում է ժամանակ շահել։ Մեր աշխատավարձերը մարելու համար պետք է ընդամենը քաղաքական որոշում, որը պետք է կայացնի իշխող կուսակցությունը և Կառավարությունը։ Անկախ նրանից, թե ում հետ, ինչ բանակցություններ են վարում, նրանք պարտավոր են որտեղից  ցանկանում են այդ գումարները ճարեն»,-ասաց նա։ 


Կառավարության առաջ բողոքի ակցիայից հետո նաիրիտցիները որոշում կայացրեցին երթով քայլել դեպի Մարդու իրավունքների պաշտպանի գրասենյակ։


Հիշեցնենք, որ «Նաիրիտ» գործարանն ունի մոտ 400 միլիոն ԱՄՆ դոլարի պարտք: Գործարանի բաժնետոմսերի 90 տոկոսը 2007-ից տնօրինում է բրիտանական Rhinoville Property Limited-ը, իսկ 10 տոկոսը պատկանում է ՀՀ Կառավարությանը: Գործարանը աշխատակիցներին չի վճարել ավելի քան մեկ տարվա աշխատավարձ: