Մետաղների միջազգային գների կանխատեսումներն այդքան էլ հոռետեսական չեն. էկոնոմիկայի նախարար
Էկոնոմիկայի նախարար Կարեն ճշմարիտյանն այսօր լրագրողների հետ զրույցում ասաց, որ սպասելի էր, որ մեր ավանդական շուկաներում տնտեսական ազդեցությունների փոփոխությունները, այնուամենայնիվ, իրենց ազդեցությունը պետք է ունենային: «Բնական է, որ ժամանակավոր արտահանման նվազում կարող է լինել և առևտրատնտեսական հարաբերությունների որոշակի դանդաղում»,- ասաց նա և նկատեց, որ ընթացքը ցույց է տալիս, որ այդ շուկաներում ճշգրտման գործընթաց է գնում:
Նախարարն ասաց, որ խնդիրը, ոչ թե գների բարձրանալ-իջնելն է, այլ առավել կայուն և հաստատուն իրավիճակի գալն է: «Մեր գործարարների ավանդական գործընկերները ոչ թե ասել են, որ հրաժարվում են հայկական արտադրանքից, այլ խնդրել են սպասել»,- ասաց նա և նշեց, որ խոսքը վերաբերում է Ռուսաստանին և ինչ-որ չափով Եվրամիությանը:
Կարեն Ճշմարիտյանն անդրադարձավ նաև մետաղների միջազգային գների անկմանը. «Ճիշտ է կա իջեցում, բայց տարվա կտրվածքով ընդհանուր կանխատեսումներն այդքան էլ հոռետեսական չեն»:
Նա նշեց, որ այս պահին կա վարչապետի կողմից ստեղծված հանձնաժողով, որը ղեկավարում է փոխվարչապետը: «Հանձնաժողովը կարճաժամկետի և երկարաժամկետի համար մշակումներ է անում, շաբաթական մի քանի անգամ քննարկում է արժութային և արտաքին տնտեսական հարաբերությունների հարցերն ու այն միջոցառումները, գործողությունները, որոնք Կառավարությունը պետք է իրականացնի` կանխարգելելու դրա հետագա խորացումը կամ առավել վատթար վիճակը»,- ասաց նա և նշեց, որ իր կարծիքով տնտեսական աճի հետ կապված այսօր հոռետեսության հիմքեր չկան:










