Հուլիսի 4-ին Փարիզում հայկական դպրոց կբացվի. ներկա կլինեն երկու երկրների վարչապետները
Փարիզի ծայրամասային Ալֆորտվիլլե համայնքում հուլիսի 4-ին տեղի կունենա «Արաբյան» հայկական դպրոցի բացման հանդիսավոր արարողությունը, որին ներկա գտնվեն Ֆրանսիայի վարչապետ Մանուել Վալսը և նրա հայ գործընկեր Հովիկ Աբրահամյանը:
Ինչպես տեղեկացնում է Prensa Armenia-ն` նախագիծն իրականացվել է Ֆրանսիայում հայ մշակույթի զարգացման ասոցիացիայի և «Սուրբ Մեսրոպ» վարժարանի ասոցիացիայի համատեղ ջանքերով, ինչպես նաև Ալֆորտվիլլեի քաղաքային ղեկավարության աջակցությամբ:
Շենքը, որի կառուցումն սկսվել էր 2013-ին, նախատեսված է օգտագործել որպես «Սուրբ Մեսրոպ» դպրոցի մասնաճյուղ` համայնքում ավելի մեծ թվով աշակերտներ ընդունելու համար: Դպրոցը զբաղեցնում է 1585 քառ. մետր տարածք և կառուցվել է Սեն գետի ափին: Այն դռները աշակերտների առաջ կբացի այս տարվա սեպտեմբերին:
Բացման արարողությանը ներկա կգտնվեն նաև այլ նշանավոր անձինք` քաղաքական գործիչներ, հոգևորականներ, ինչպես նաև Ֆրանսիայում հայ մշակույթի զարգացման ասոցիացիայի նախագահ Նորվան Զաքարյանը, նախագծի հիմնական բարերար Գևորգ Արաբյանը:










