Լոս Անջելեսի ոստիկանությունը տներից մեկում 1200 միավոր զենք և 2 տոննա ռազմամթերք է հայտնաբերել
Լոս Անջելեսի ոստիկանությունը մեգապոլիսի տներից մեկում հայտնաբերել է զինանոց, որտեղ եղել է 1200 միավոր հրազեն և 2 տոննա ռազմամթերք, գրում է ТАСС-ը:
Զինանոցը հայտնաբերվել է անցած շաբաթ, սակայն իշխանություններն այդ մասին ԶԼՄ-ներին հայտնել են միայն հիմա:
Զինանոցը եղել է Խաղաղ օվկիանոս դուրս եկող մոդայիկ թաղամասում: Տան խուզարկությունն անցկացվել է սեփականատիրոջ տարօրինակ մահվան պատճառով, ով մահացել էր փողոցում՝ իր տնից մի քանի տասնյակ մետր հեռավորության վրա:
«Մենք ապշել էինք տեսնելով զենքի քանակը»,- հայտարարել է ոստիկանության ներկայացուցիչ Էնդրյու Սմիթը: - Զինանոցում եղել են արագագործ ատրճանակներ, կիսաավտոմատ հրացաններ, կարաբիններ»: Նրա խոսքերով՝ մի քանի բեռնատար է պահանջվել տանը և ավտոտնակում եղած ռազմամթերքը տեղափոխելու համար:
Ոստիկանությունը դեռ չգիտի, թե ինչպես և ինչու է մարդը, ում անունը չի բացահայտվում, իր մոտ պահել ողջ այդ զենքը: Տվյալ գործով հետաքննությանն ընդգրկվել են Կալիֆոռնիա նահանգի ոստիկանության խոշոր ուժերը:










