ԵՏՄ արդյունաբերության նախարարը՝ Իրանի հետ նոր կարգավիճակով համագործակցելու և մետաքսի ճանապարհի նախագծի մասին
ԵՏՄ արդյունաբերության և ագրոարդյունաբերության նախարար, կոլեգիայի անդամ Սերգեյ Սիդորոսկուց լրագրողները հետաքրքրվեցին, թե ինչ կարծիք ունի Իրանի հետ ձեռք բերված համաձայնության մասին և այն ինչպես կանդրադառնա ԵՏՄ-ի վրա:
«Այսօր ավելի քան 40 պետություն հայտարարել է այն մասին, որ ցանկություն ունի աշխատել մեզ հետ ազատ տնտեսական տարածքում, այդ թվում նաև Իրանը»,- ասաց նա և հավելեց, թե այդ ուղղությամբ ակտիվ քննարկումներ են գնում չինական, հնդկական գործընկների հետ: Նա տեղեկացրեց, որ նախորդ ամսին արդեն փաստաթուղթ է ստորագրվել վիետնամական կողմի հետ, ըստ որի՝ ԵՏՄ-ի անդամ երկրները, այդ թվում նաև Հայաստանը կարող են ազատ աշխատել:
«Այդ իսկ պատճառով մենք քայլ առ քայլ բացում ենք բիզնեսի համար հնարավորություններ՝ ազատ տնտեսական տարածքում համագործակցելու համար»,- ասաց նա:
Իսկ թե մետաքսի ճանապարհի վերականգնումը որքանով է համարում իրատեսական, հաշվի առնելով վերջին շրջանում այդ մասին ավելի շոշափելի քննարկումները, նշեց, որ իրենց երկրների նախագահների հանձնարարությամբ աշխատում են այդ ուղղությամբ: «Մեր կարծիքով այդ նախագիծը շատ հետաքրքիր է ԵՏՄ-ի համար և կարծում ենք առաջիկա հեռանկարում ավելի շոշափելի կլինի»,- ասաց նա:
Սերգեյ Սիդորոսկին նշեց, որ սեպտեմբերին Վլադիվոստոկում կանցկացնեն մեծ բիզնես ֆորում՝ «Մետաքսի ճանապարհ և ԵՏՄ ապագա հեռանկարները» թեմայով, որը հնարավորություն կտա հասկանալ ոչ միայն նախագծի տրանսպորտային խնդիրները, այլ նաև նոր բիզնեսի նոր հնարավորությունները: Իսկ թե Հայաստանը ներառված է ծրագրում, պատասխանեց, որ իհարկե այո:










