Բրյուսելի օդանավակայանի անվտանգության ծառայության անձնակազմը գործադուլ է հայտարարել
Բրյուսելի միջազգային օդանավակայանի անվտանգության ծառայության անձնակազմը գործադուլ է սկսել, որի ընթացքում ուղևորների հսկողությունը և ստուգումները կիրականացվեն սովորականից ավելի երկար, գրում է ria.ru-ն:
Իրենց ակցիայով գործադուլ անող աշխատակիցները ցանկանում են օդանավակայանի ղեկավարության ուշադրությունը հրավիրել խնդրին, որ Շենգենյան գոտու երկրներ թռչող ուղևորների հսկողության համար տեղադրված անվտանգության նոր պտուտակադռնակները (տուրնիկետ) ամբողջովին հուսալի չեն:
Դա, մասնավորապես, հանգեցրել է նրան, որ վերջերս Հռոմ թռած ինքնաթիռում երկու մարդ է հայտնվել, որոնք ոչ մի փաստաթուղթ չեն ունեցել: Ընդհանուր առմամբ, պտուտակադռնակների օգտագործման ընթացքում մոտ 50 տարբեր միջադեպ է գրանցվել:
Հաղորդվում է, որ անվտանգության ծառայության անձնակազմի գործադուլը կարող է տևել մի քանի օր:
Օդանավակայանի ղեկավարությունը խորհուրդ է տալիս ուղևորներին օդանավակայան ժամանել առնվազն չվերթից երեք ժամ առաջ: Հաշվի առնելով այն, որ այսօր սպասվում են մի քանի տասնյակ հազար ուղևորներ, գործադուլի պատճառով հերթերն անխուսափելի են։










