Ադրբեջանում ծեծի հետևանքով մահացած լրագրողի գործով կասկածյալներ են ձերբակալվել
Ադրբեջանի ոստիկանությունը մի քանի մարդու է ձերբակալել, որոնք կասկածվում են լրագրողին ծեծելով սպանելու համար, հաղորդում է «Ազատություն» ռադիոկայանը։
Հիշեցնենք, որ լրագրող Ռասիմ Ալիևը սոցցանցում գրառում էր հրապարակել, որում քննադատել էր ֆուտբոլիստ Ջավիդ Հուսեյնովին: Դրանից հետո լրագրողին ծեծի են ենթարկել, որից հետո ստացված վնասվածքներից վերջինս մահացել է հիվանդանոցում։
Ադրբեջանական լրատվամիջոցները, վկայակոչելով Բաքվի ոստիկանությունում աղբյուրներին, հայտնել են, որ ձերբակալված կասկածյալներից մեկն Էլզան Իսմայիլովն է, ով «Գաբալա» ֆուտբոլային ակումբի հայտնի խաղացող Ջավիդ Հուսեյնովի եղբայրն է:
30-ամյա լրագրող Ռասիմ Ալիևը հիվանդանոցում պատմել էր, որ իր վրա հարձակվել են Հուսեյնովի աջակիցները՝ Facebook-ում մարզիկի հասցեին քննադատական խոսքերի համար:
«Գաբալա» ֆուտբոլային ակումբն օգոստոսի 10-ին հայտնել է, որ Հուսեյնովը ժամանակավորապես հեռացվել է մինչ հետաքննության ավարտը:
Հուսեյնովը հայտարարություն է արել օգոստոսի 9-ին՝ ժխտելով հարձակման մեջ իր ներգրավվածությունը:










