ՌԴ-ում հայտնաբերվել է ավիաաղետի հետևանքով զոհված հայերից վերջինի դին (լուսանկարներ)
Մերձմոսկովյան Իստրայի ջրամբարում հայտնաբերվել է շաբաթ օրը տեղի ունեցած ավիավթարի վերջին զոհի՝ Պարույր Մանուկյանի դին, տեղեկացնում է Интерфакс գործակալությունը:
Այդ մասին հայտնել է Ռուսաստանի քննչական կոմիտեի պաշտոնական ներկայացուցիչ Վլադիմիր Մարկինը:
«Ոչ միայն հայտնաբերվել, այլև ջրից դուրս է բերվել 28-ամյա տղամարդու մարմինը, որը բախման պահին գտնվել է ինքնաթիռում»,- ասել է Մարկինը։
Օգոստոսի 8-ի երեկոյան Իստրայի ջրամբարի օդային տարածքում բախվել են ուղղաթիռ և հիդրոինքնաթիռ, ինչի հետևանքով զոհվել է 9 մարդ, այդ թվում՝ երկու երեխա:
Ավիաաղետի հետևանքով զոհված բոլոր 4 հայազգի ուղևորները ՀՀ քաղաքացիներ են և Իստրայի ջրամբար էին մեկնել զոհված Պարույր Մանուկյանի ծննդյան օրը նշելու:
Ինչպես Tert.am-ի հետ զրույցում մանրամասնել էին Ռուսաստանի Դաշնությունում ՀՀ դեսպանատան լրատվական ծառայությունից, Պավել (Պարույր) և Լարիսա Մանուկյաններն ամուսիններ են, իսկ երեխաները` 8 տարեկան Էրիկ և 10 տարեկան Օֆելյա Գելչյանները` նրանց զարմիկները:















