Սիրիայում սպանության մեղադրանքով ձերբակալվել է նախագահ Ասադի հորեղբոր որդին. լրատվամիջոցներ

09:19 • 11.08.15

Սիրիական իշխանությունները ձերբակալել են Սիրիայի նախագահ Բաշար ալ-Ասադի հորեղբոր որդուն, ում մեղադրում են զինվորականի սպանության համար, տեղեկացնում է РИА Новости գործակալությունը:

 

Սիրիական պետական ՍԱՆԱ գործակալությունը հաղորդել է, որ Սուլեյման Հիլալ Ասադը ձերբակալվել է ու փոխանցվել համապատասխան մարմիններին:

 

Սիրիայում մարդու իրավունքների ուսումնասիրության կենտրոնի հաղորդմամբ՝ Սուլեյման Ասադը ձերբակալվել է Լաթաքիա քաղաքի մոտակայքում:

 

Հաղորդվում է, որ նախագահի հորեղբորորդին մեղադրվում է սիրիացի գնդապետ Հասան աշ-Շեյխի սպանության համար, ինչը տեղի էր ունեցել ճանապարհային միջադեպի հետևանքով սկսված վիճաբանության ընթացքում:

 

Միջադեպը տեղի էր ունեցել Լաթաքիայում, ինչից հետո ավելի քան 1000 մարդ էր դուրս եկել փողոց՝ ի նշան զինվորականի սպանության դեմ բողոքի։