Օբաման խոստացել է Կոնգրեսին շարունակել ճնշում գործադրել Իրանի վրա. The New York Times
Ամերիկյան Կոնգրեսին ուղղված նամակում ԱՄՆ նախագահ Բարաք Օբաման հայտարարել է, որ Միացյալ Նահանգներն անհրաժեշտության դեպքում կշարունակի Իրանի վրա տնտեսական ճնշում գործադրել և կօգտագործի ռազմական միջոցներն իրանական ագրեսիան զսպելու համար՝ ինչպես առաջարկված միջուկային համաձայնագրի գործողության ընթացքում, այնպես էլ հետո, գրում է The New York Times-ը:
«Եթե Իրանը սկսի շեղվել միջուկային զենքի կողմը, ԱՄՆ-ի տրամադրության տակ գտնվող ցանկացած տարբերակ, ներառյալ՝ ռազմական, հասանելի կմնա ինչպես գործարքի գործողության ընթացքում, այնպես էլ դրանից հետո»,- նշել է Օբաման:
Նա նաև հաստատել է Իրանի կողմից Լիբանանում «Հըզբոլլահ» խմբավորմանը և Սիրիայում Բաշար ալ-Ասադի կառավարությանն աջակցության շրջանակում սահմանված պատժամիջոցներն ուժի մեջ թողնելու մտադրությունը։
ԱՄՆ նախագահը նաև խոստացել է ամրապնդել Իսրայելի և Պարսից ծոցի դաշնակից երկրների հետ համագործակցությունը՝ Եմենում իրավիճակն ապակայունացնելու Իրանի փորձերին դիմադրելու համար։










