Բրիտանիայի Համայնքների պալատը հավանություն է տվել ԵՄ-ին անդամակցության վերաբերյալ հանրաքվեի անցկացմանը
Մեծ Բրիտանիայի խորհրդարանի ստորին՝ Համայնքների պալատը հավանություն է տվել Դևիդ Քեմերոնի կառավարության առաջարկին՝ Եվրամիությանը Միացյալ Թագավորության անդամակցության շուրջ հանրաքվե անցկացնելու վերաբերյալ, տեղեկացնում է Lenta.ru-ն:
«Կողմ» է քվեարկել 316 օրենսդիր, «դեմ»՝ 53-ը: Ավելի ուշ հանրաքվեի հարցը պետք է ներկայացվի Լորդերի պալատի քննարկմանը:
Ավելի վաղ եվրոսկեպտիկների լոբբին հանդես էր եկել հանրաքվեի հարցի ձևակերպումը շտկելու պահանջով:
Վարչապետը ստիպված էր եղել «Պե՞տք է արդյոք, որ Միացյալ Թագավորությունը մնա Եվրամիության անդամ» հարցին ավելացնել «թե՞ պետք է լքի այն» արտահայտությունը։
Հանրաքվեն պետք է անցկացվի մինչև 2017 թվականի վերջ։ Երկրի վարչապետն անձամբ կողմ է ԵՄ կազմում մնալուն, սակայն պայմանով, որ կառույցը զգալիորեն բարեփոխվի։










