ՌԴ և ՀՀ էներգետիկայի նախարարներն էներգետիկ ոլորտում համաձայնագրերի արձանագրություններ են ստորագրել

09:40 • 08.09.15

Ռուսաստանի Դաշնության էներգետիկայի նախարար Ալեքսանդր Նովակն աշխատանքային հանդիպում է ունեցել Հայաստանի էներգետիկայի և բնական պաշարների նախարար Երվանդ Զախարյանի հետ, հայտնում է Ռուսաստանի էներգետիկայի նախարարության կայքը։

 

Ալեքսանդր Նովակը նշել է, որ Ռուսաստանի և Հայաստանի միջև էներգետիկ ոլորտում ավանդական համագործակցությունը նոր ազդակ է ստացել Եվրասիական տնտեսական միության մասին պայմանագրին Հայաստանի միանալով:

 

«Այժմ Ռուսաստանը Հայաստան նավթամթերքի հիմնական մատակարարն է: Ընթացիկ տարում առանց մաքսատուրքերի Հայաստան բնական գազի մատակարարումը կազմել է ավելի քան 1 միլիարդ խորանարդ մետր»,- ասվում է հաղորդագրության մեջ։

 

Երկկողմ հանդիպման ժամանակ կողմերը ստորագրել են Ռուսաստանի Դաշնության կառավարության և Հայաստանի Հանրապետության կառավարության միջև համաձայնագրում Հայաստանի Հանրապետություն բնական գազի մատակարարման ընթացքում գների ձևավորման կարգի մասին փոփոխություններ մտցնելու մասին արձանագրությունը, որը սահմանում է Հայաստան մատակարարվող ռուսական գազի նախնական գնի նվազումը 189-ից մինչև 165 դոլար։

 

Ռուսաստանի և Հայաստանի էներգետիկայի նախարարները նաև ստորագրել են Ռուսաստանի Դաշնության կառավարության և Հայաստանի Հանրապետության կառավարության միջև «АрмГосгазпром» ՓԲԸ-ի բաժնետոմսերի առքուվաճառքի պայմանների և հետագա գործունեության մասին համաձայնագրում փոփոխություններ մտցնելու մասին արձանագրությունը։

 

Բաժնետոմսերի վերաբերյալ արձանագրության համաձայն՝ հայկական կողմը ստանձնել է Հայաստանում «Գազպրոմ» ԲԲԸ-ի էլեկտրաէներգիայի ակտիվների տնտեսապես արդյունավետ աշխատանքի պայմաններն ապահովելու պարտավորությունը՝ ինչպես ներքին շուկայում, այնպես էլ արտահանման դեպքում:

 

Հանդիպման ավարտին Ալեքսանդր Նովակը վստահություն է հայտնել, որ հետագա համատեղ աշխատանքը կլինի նույնքան արդյունավետ: