Արարատ-Երևան ճանապարհն արդեն բացվել է, գյուղնախարարը հորդորել է գործարաններին մթերել խաղողի ողջ բերքը
Արարատ-Երևան ճանապարհը, որտեղ առավոտյան լարված իրավիճակ էր, բացված է, այնտեղ այցելած գյուղատնտեսության նախարար Սերգո Կարապետյանը դժգոհող գյուղացիներին փոխանցել է, որ հորդորել է գործարանների տնօրինությանը` մթերել գյուղացու արտադրած ողջ խաղողը: Այս մասին Tert.am-ին հայտնեց Սերգո Կարապետյանի մամուլի քարտուղար Անի Սմբատյանը:
Նշենք, որ առավոտյան մարզի մի շարք համայնքների բնակիչներ փակել էին ճանապարհը , քանի որ յուրաքանչյուր հողագործից վերցնում են 5 տոննա խաղող, այն դեպքում, երբ առնվազն 40 տոննա խաղող ունեն:
Նշենք, որ համանման խնդիր կա նաև հարևան Արմավիրի մարզում, սակայն. այնտեղ ճանապարհը փակելու քայլին չեն դիմել:
Արտամետ համայնքի ղեկավար Անահիտ Դավթյանն էլ Tert.am-ին հայտնել էր, որ «Գյուղացիները պայմանագրեր ունեն, ինչքան որ կա պայմանագրերի մասով` վերցնում են, մնացածը չեն ընդունում»:
Իսկ օրինակ` Արմավիր համայնքի ղեկավար Սաշա Հակոբյանը Tert.am-ին հայտնեց, որ իրենց գյուղում նման խնդիր չկա, քանի որ Պռոշյանի գինու-կոնյակի գործարանի մասնաճյուղը հենց իրենց գյուղում է:












