Գերմանիայում Փարիզի ահաբեկչություններին ներգրավվածության մեջ կասկածվող երեք անձ է ձերբակալվել
Գերմանիայի ոստիկանությունը Փարիզում իրականացված ահաբեկչություններին ներգրավվածության մեջ կասկածվող երեք մարդու է ձերբակալել, հաղորդում է meduza.io-ն:
Կասկածյալները ձերբակալվել են Աախեն քաղաքի մոտակայքում։ Այլ մանրամասներ դեռ չեն հաղորդվում:
Հիշեցնենք, որ ուրբաթ երեկոյան Փարիզում ահաբեկչությունների շարք էր տեղի ունեցել: Անհայտ անձինք կրակ էին բացել քաղաքի ռեստորաններից մեկում, երեք պայթյուն գրանցվել էր «Ստադ դե Ֆրանս» մարզադաշտի մոտակայքում, որտեղ տեղի էր ունենում Ֆրանսիայի և Գերմանիայի հավաքականների ընկերական հանդիպումը և որին ներկա էր Ֆրանսիայի նախագահ Ֆրանսուա Օլանդը։
Բացի այդ, «Բատակլան» թատրոնում ռոք համերգի ընթացքում անհայտ անձինք պատանդ էին վերցրել հանդիսականներին։ Վերջին տվյալներով՝ զոհվել է շուրջ 130 մարդ, վիրավորվել ավելի քան 300-ը։










